ކަނޑުމަގުން ރާއްޖެއަށް ސިއްރުން އެތެރެކުރަން އުޅުނު 8.5 މިލިއަނަށްވުރެ ގިނަ ސިނގިރޭޓް ސްޓިކްސް މޯލްޑިވްސް ކަސްޓަމްސް ސާވިސްއިން އަތުލައިގެންފިއެވެ.
މޯލްޑިވްސް ކަސްޓަމްސް ސާވިސްއިން މައުލޫމާތު ދެއްވި ގޮތުގައި، މި ތަކެތި އަތުލައިގެންފައިވަނީ ކަނޑުމަގުން ރާއްޖެ ގެނައި ޝިޕްމެންޓެއްގައި ގާނޫނާއި ގަވާއިދާ ހިލާފު ތަކެތި ހުރެދާނެކަމަށް ބެލެވިގެން 2026 ސެޕްޓެންބަރު 27 ވަނަ ދުވަހު މާލެ ކޮމާޝަލް ހާބަރުގައި ހިންގި ހާއްސަ އޮޕަރޭޝަނެއްގައެވެ.
މި އޮޕަރޭޝަންގައި "ޖެނެރަލް ކާގޯ" ގެ ގޮތުގައި ޑިކްލެއާކޮށްފައިވާ ޝިޕްމަންޓެއް ބަލައިފާސްކުރިއިރު، އެ ޝިޕްމަންޓުގެ ތެރޭގައި ގިނަ އަދަދެއްގެ ސިނގިރޭޓް ފޮރުވާފައި ހުއްޓާ ވަނީ ފެނިފައެވެ. މިގޮތުން ޖުމްލަ 8,527,480 (އަށް މިލިއަން ފަސްސަތޭކަ ސައްބީސް ހާސް ހަތަރުސަތޭކަ އައްސި) ސިނގިރޭޓް ސްޓިކްސް ފެނިފައިވާ ކަމަށާއި، މި ތަކެތި މިހާރު ވަނީ ކަސްޓަމްސްގެ ބެލުމުގެ ދަށަށް ގެނެވިފައި ކަމަށް އެ މުއައްސަސާއިން ހާމަކުރެއެވެ. އަދި މި މައްސަލަ މިހާރު އިތުރަށް ތަހުގީގު ކުރަމުން އަންނަ ކަމަށްވެސް ކަސްޓަމްސްއިން ބުނެފައިވެއެވެ.
ރާއްޖެއަށް ސިއްރުން މުދާ އެތެރެކުރުން ހުއްޓުވުމަށާއި، ހާއްސަކޮށް ދުންފަތުގެ އިސްތިއުމާލުކުރުން މަދުކުރުމަށް ސަރުކާރުން ކުރަމުންދާ މަސައްކަތްތަކުގެ ދަށުން، ކަސްޓަމްސްއިން ދަނީ ރާއްޖޭގެ ބަނދަރުތަކުން އެތެރެކުރާ މުދާތައް ވަރަށް ފަރުވާތެރިކަމާއެކު ބަލައި ފާސްކުރަމުންނެވެ. މިފަދަ ގަވާއިދާ ހިލާފު އަމަލުތައް ހުއްޓުވުމަކީ ގައުމުގެ އިގްތިސާދީ އަދި އިޖުތިމާއީ ރައްކާތެރިކަމަށްޓަކައި އެޅޭ މުހިންމު ފިޔަވަޅެއް ކަމަށް ކަސްޓަމްސްއިން ފާހަގަކުރެއެވެ. ދުންފަތުގެ އިސްތިއުމާލު ކުރުން ހުއްޓުވުމަކީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން އާންމު ސިއްހަތު ކުރިއެރުވުމަށްޓަކައި ވަރަށް ބޮޑު އިސްކަމެއް ދެއްވާ ކަމެކެވެ.
މީގެ އިތުރުން، ފުލުހުންގެ ބެލުމުގެ ދަށުގައި ހުރި ގިނަ އަދަދެއްގެ ސިނގިރޭޓާއި ދުންފަތް ވެސް މިހާރު ވަނީ ނައްތާލާފައެވެ.
ސެޕްޓެންބަރު 28 ވަނަ ދުވަހު ދޫނިދޫގައި ނައްތާލި މި ތަކެއްޗަކީ، ހެންވޭރު ގެއެއްގެ އެޕާޓްމަންޓެއްގައި ހިންގަމުންދިޔަ އޮފީހެއްގައި ގާނޫނާ ހިލާފަށް މެޝިން ބަހައްޓައިގެން ސިނގިރޭޓް އުފައްދާ ކަމަށް ތުހުމަތުކުރެވުނު މައްސަލައަކާ ގުޅިގެން، 30 ޖަނަވަރީ 2025 ގައި ފުލުހުން ހިންގި އޮޕަރޭޝަނެއްގައި އަތުލައިގެންފައިވާ ތަކެއްޗެވެ.
މިގޮތުން ނައްތާލެވުނު ތަކެތީގެ ތެރޭގައި 4,285 ސިނގިރޭޓް ކާޓޫނާއި، 232 ފޮށި ސިނގިރޭޓްގެ އިތުރުން 93.60 ކިލޯގެ ދުންފަތް ހިމެނެއެވެ.
މި ތަކެތި ނައްތާލާފައިވަނީ ފުލުހުންގެ ބެލުމުގެ ދަށަށް ގެނެވޭ މިފަދަ ތަކެތި ނައްތާލުމުގައި އަމަލުކުރުމަށް ހަމަޖެހިފައިވާ އުސޫލުގެ ދަށުން، އެކަމަށްޓަކައި ހާއްސަކޮށް އެކުލަވައިލާފައިވާ ކޮމިޓީގެ ބެލުމުގެ ދަށުން ކަމަށް ފުލުހުން މައުލޫމާތު ދެއެވެ.
