މަސްތުވާތަކެތި އެތެރެހަށީގައި ފޮރުވައިގެން ރާއްޖެ އެތެރެކުރަން އުޅުނު ނޭޕާލަށް ނިސްބަތްވާ އަންހެނަކާ ފިރިހެނަކު ކަސްޓަމްސް އާއި ފުލުހުން ގުޅިގެން ހައްޔަރުކޮށްފިއެވެ.
މި މައްސަލައިގައި މި މަހުގެ 25 ވަނަ ދުވަހު ހައްޔަރުކޮށްފައިވަނީ އުމުރުން 40 އަހަރުގެ އީތުރާނީ ގަލެ އާއި 47 އަހަރުގެ ނިއްކަ ތަމަންގް އެވެ.
މި ދެ މީހުންނާމެދު ކަސްޓަމްސް އޮފިސަރުންނަށް ޝައްކުކުރެވިގެން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންގޮސް ސްކޭން ކުރުމުން، އެ މީހުންގެ ހަށިގަނޑު ތެރޭގައި "ފޮރިން ބޮޑީސް" ހުރިކަމަށް ވަނީ ދައްކާފައެވެ. ފުލުހުން މަޢުލޫމާތު ދީފައިވާ ގޮތުގައި މި ދެ މީހުންގެ ހަށިގަނޑުން ޖުމްލަ 142 ބުލެޓް ޑްރަގް ފެނިފައިވާއިރު، އޭގެ ޖުމްލަ ބަރުދަނުގައި 1.5 ކިލޯ ހުއްޓެވެ.
މި މައްސަލައާއި ގުޅިގެން ނެރުނު ކޯޓު އަމުރުގައިވަނީ، ކޮންމެ މީހެއްގެ ހަށިގަނޑުން ބޮޑުކަމުދިޔައިރު 53 ބުލެޓް (650 ގްރާމް) ނެގާފައިވާ ކަމަށެވެ. ކްރިމިނަލް ކޯޓުގައި، ތަރުޖަމާނެއްގެ އެހީގައި ކުރިއަށްގެންދިޔަ ބަންދު މުއްދަތު މަޖިލީހުގައި މި ދެ މީހުންގެ ބަންދަށް 30 ދުވަސް ވަނީ ޖަހާފައެވެ. އަދި އެ ދެމީހުންނަށްވެސް ދިފާއީ ވަކީލަކު ހަމަޖެއްސުމުގެ ފުރުސަތު ވަނީ ދީފައެވެ.
މި މައްސަލަ ފުލުހުން ދަނީ ތަހުގީގުކުރަމުންނެވެ.
