ހޮރުމުޒް ކަނޑުއޮޅި އަލުން ހުޅުވާލުމާ ގުޅޭގޮތުން ކުރިއަށްދާ މަޝްވަރާތަކުގައި ކުރިއެރުންތަކެއް ލިބިފައިވާ ކަމަށް އެމެރިކާގެ އިސް އޮފިޝަލުން ވިދާޅުވުމާ ގުޅިގެން، ދުނިޔޭގެ ބާޒާރުގައި ސާފުނުކުރާ ތެލުގެ އަގު ދަށަށް ހިނގައްޖެއެވެ.
ތެލުގެ އަގު ކަނޑައެޅުމުގައި ބަލާ މައިގަނޑު މިންގަނޑު ކަމަށްވާ ބްރެންޓް ކްރޫޑްގެ ފީފާއެއްގެ އަގު ވަނީ ގާތްގަނޑަކަށް ފަސް އިންސައްތަ ދަށަށް ގޮސް، 80 ޑޮލަރަށް ވުރެ ދަށަށް ވެއްޓިފައެވެ. އަދި އެމެރިކާގެ ވެސްޓް ޓެކްސަސް އިންޓަމީޑިއޭޓް (ޑަބްލިއުޓީއައި) ގެ އަގު ވެސް ފަސް އިންސައްތަ ދަށަށް ގޮސް، ފީފާއެއްގެ އަގު ވަނީ 76 ޑޮލަރަށް ވެއްޓިފައެވެ. މިއީ ޖުލައި 13 ވަނަ ދުވަހަށް ފަހު ތެލުގެ އަގު މިހާ ބޮޑަށް ދަށަށް ދިޔަ ފުރަތަމަ ފަހަރެވެ.
އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވި ގޮތުގައި، އޮމާން މެދުވެރިކޮށް އީރާނާއެކު ކުރިއަށްދާ މަޝްވަރާތަކުގައި، ކަނޑުއޮޅިން އިތުރު ބޯޓުފަހަރަށް ދަތުރުކުރެވޭނެ ގޮތް ހެދުމާ ގުޅޭގޮތުން ވަނީ ކުރިއެރުންތަކެއް ލިބިފައެވެ. ނަމަވެސް އަދި ފަހު ގޮތެއް ނުނިމޭ ކަމަށާއި، ވަރަށް އަވަހަށް އެއްބަސްވުމަކަށް އާދެވޭނެ ކަމަށް އުންމީދުކުރައްވާ ކަމަށް އޭނާ ވިދާޅުވިއެވެ. މީގެ އިތުރުން، އެމެރިކާގެ ޓްރެޝަރީ ސެކްރެޓަރީ ސްކޮޓް ބެސެންޓް ސީއެންބީސީއަށް މައުލޫމާތު ދެއްވަމުން ވިދާޅުވީ، ކަނޑުއޮޅި ހުޅުވާލުމުގެ އެއްބަސްވުމަކަށް އަންގާރަ ނުވަތަ ބުދަ ދުވަހު އާދެވުމުގެ ފުރުސަތު އެބައޮތް ކަމަށެވެ.
މިކަމާ ގުޅިގެން އީރާނުގެ ހާރިޖީ ވުޒާރާގެ ތަރުޖަމާނު ބުނީ، އެމެރިކާއާއެކު ސީދާ މަޝްވަރާތަކެއް ނުކުރާ ކަމަށާއި އެފަދަ ވިސްނުމެއް ވެސް ނެތް ކަމަށެވެ. ނަމަވެސް މެދުވެރިއެއްގެ ދައުރު އަދާކުރާ އޮމާނާއެކު ކުރިއަށްދާ މަޝްވަރާތައް ރަނގަޅު ކަމަށް އޭނާ ފާހަގަކުރިއެވެ. އަނެއްކޮޅުން، މެދުވެރިއެއްގެ ގޮތުގައި ހަރަކާތްތެރިވާ ގަތަރުން ބުނި ގޮތުގައި، މައްސަލަ ހައްލުކުރުމަށް އެހެން ފަރާތްތަކާއެކު މަސައްކަތް ކުރަމުންދިޔަ ނަމަވެސް، ސީދާ މަޝްވަރާތަކެއް ބޭއްވުމަށް އަދި ރޭވިފައެއް ނުވެއެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ، ވިޔަފާރި ބޯޓުފަހަރަށް ދަތުރުކުރެވޭނެ ގޮތް ހެދުމަށް އެއްބަސްވުމަކަށް އައުމަށް އީރާނަށް ލިބޭ “އެންމެ ފަހު ފުރުސަތަކީ” މިއީ ކަމަށް ވިދާޅުވެ އިންޒާރު ދެއްވާފައެވެ. އަދި މަޝްވަރާތައް ފެށުމަށްޓަކައި އީރާނަށް ދޭން އުޅުނު ވަރުގަދަ ހަމަލާތަކެއް ހުއްޓާލާފައިވާ ކަމަށް ވެސް ޓްރަމްޕް ވިދާޅުވިއެވެ.
ފެބްރުއަރީ މަހުގެ ފަހުކޮޅު މައްސަލަ ގޯސްވުމުގެ ކުރިން، ދުނިޔޭގެ ތެލާއި ގޭހުގެ ސަޕްލައިގެ ފަސްބައިކުޅަ އެއްބައި ދަތުރުކުރަނީ ހޮރުމުޒް ކަނޑުއޮޅިންނެވެ. ނަމަވެސް އީރާނުން ވަނީ އެ މަގުން ކުރާ ދަތުރުތައް ގާތްގަނޑަކަށް ހުއްޓުވާފައެވެ. އަދި އެމެރިކާއިން ވަނީ އެ ސަރަހައްދުގައިވާ އީރާނުގެ ބަނދަރުތައް ބަންދުކޮށްފައެވެ. މީގެ އިތުރުން، ޔަމަނުގެ ހޫތީން ދަނީ ޖުލައި 20 ވަނަ ދުވަހުން ފެށިގެން ރަތް ކަނޑުގައިވާ ސައުދީ އަރަބިއްޔާގެ ބަނދަރުތަކަށް ހުރަސްއަޅަމުންނެވެ. އިންޑިއާގެ ޝިޕިން މިނިސްޓަރު ވިދާޅުވި ގޮތުގައި، އަންގާރަ ދުވަހު ޔަމަނުގެ ކަނޑުގެ ސަރަހައްދާ ކައިރިން އިންޑިއާގެ ބޯޓަކަށް ހަމަލާދީ ފައްތާލާފައިވާއިރު، އޭގައި ތިބި 14 މީހުން ވަނީ ސަލާމަތްކޮށްފައެވެ.
މި މައްސަލަތަކާ ގުޅިގެން ދުނިޔޭގެ އެކި ކަންކޮޅުތަކުގައި ޕެޓްރޯލާއި ޑީސަލްގެ އަގު ވަނީ އުފުލިފައެވެ. އިނގިރޭސިވިލާތުގެ އާރްއޭސީ ގްރޫޕުން ހާމަކުރި ގޮތުގައި އެ ގައުމުގައި ޕެޓްރޯލް ލީޓަރެއްގެ އަގު ވަނީ 1.60 ޕައުންޑަށް އަރާފައެވެ. އަދި އެމެރިކާގެ އޭއޭއޭ އިން ބުނި ގޮތުގައި އެ ގައުމުގައި ޕެޓްރޯލް ގޭލަނެއްގެ އެވްރެޖް އަގު ހަތަރު ޑޮލަރަށް ވުރެ މަތީގައި ހުރިއިރު، ޑީސަލް ގޭލަނެއްގެ އަގު އުޅެނީ 5.40 ޑޮލަރުގައެވެ. ތެލުގެ އަގު އުފުލުމުގެ ސަބަބުން ބީޕީ، ޝެލް، ޝެވްރޯން އަދި އެކްސޮން މޯބިލް ފަދަ ބޮޑެތި ކުންފުނިތަކަށް ވަނީ ބޮޑު ފައިދާއެއް ލިބިފައެވެ.
ސީބީއެސް ނިއުސްއާ ހަވާލާދީ ބީބީސީން ރިޕޯޓުކޮށްފައިވާ ގޮތުގައި، މި މައްސަލަ ދިގުލައިގެން ދިއުމުގެ ސަބަބުން އެމެރިކާގެ އަތުގައި ހުރި ދުރު ރާސްތާގެ މިސައިލްތަކުގެ ސްޓޮކް ވަނީ ގާތްގަނޑަކަށް ހުސްވެފައެވެ. އޭޖޭ ބެލްގެ މާލީ ދިރާސާތަކާ ބެހޭ އިސްވެރިޔާ ޑެނީ ހިއުސަން ފާހަގަކުރި ގޮތުގައި، ދެމެހެއްޓެނިވި އެއްބަސްވުންތަކަކަށް އައުމަކީ ކިހާ ނާޒުކު ކަމެއްކަން އިންވެސްޓަރުންނަށް އެނގެއެވެ. ނަމަވެސް މަޝްވަރާތަކުގެ ހަބަރާއެކު ތެލުގެ އަގު ދަށަށް ދިއުމާއި، އާޓިފިޝަލް އިންޓެލިޖެންސްއާ ގުޅުންހުރި ކުންފުނިތަކުގެ ނަތީޖާތަކާ ގުޅިގެން، އަންގާރަ ދުވަހު އެމެރިކާގެ ހިއްސާގެ ބާޒާރުގައި ވިޔަފާރިކުރެވުނު މިންވަރު ވަނީ މައްޗަށް ގޮސްފައެވެ.
