ހއ. ބާރަށު ކައުންސިލުން ފާސްކުރި ބަޖެޓާއި އެ ކައުންސިލްގެ މާލީ ބަޔާންތަކުގައި ހިމަނާފައިވާ ބަޖެޓުގެ އަދަދުތަކާ ދެމެދު ބޮޑެތި ފަރަގުތަކެއް ހުރިކަން އޮޑިޓާ ޖެނެރަލްގެ އޮފީހުން ހާމަކޮށްފިއެވެ.
އޮޑިޓަރ ޖެނެރަލްގެ އޮފީހުން މިއަދު އާންމުކުރި ބާރަށު ކައުންސިލްގެ 2022 ވަނަ އަހަރުގެ މާލީ ބަޔާނުގެ އޮޑިޓް ރިޕޯޓުގައި ބުނެފައިވާ ގޮތުގައި، ކައުންސިލްގެ އާމްދަނީގެ ބަޖެޓުގައި 7.1 މިލިއަން ރުފިޔާގެ ފަރަގެއް ހުރިއިރު، ހަރަދުގެ ބަޖެޓުގައި 6.1 މިލިއަން ރުފިޔާގެ ފަރަގެއް ހުރިކަން ވަނީ ފާހަގަވެފައެވެ. ކައުންސިލުން ތައްޔާރުކޮށްފައިވާ މާލީ ބަޔާންތަކަކީ ހަގީގަތާ އެއްގޮތަށް، ސައްހަކަމާއެކު ތައްޔާރުކޮށްފައިވާ ބަޔާންތަކެއްކަން ކަށަވަރުނުވާތީ، އޮޑިޓާ ޖެނެރަލް ވަނީ އެ ބަޔާންތަކަށް "އެޑްވާސް އޮޕީނިއަން" އެއް ދެއްވާފައެވެ.
އޮޑިޓް ރިޕޯޓުގައި ފާހަގަކޮށްފައިވާ އެންމެ ބޮޑު އެއް މައްސަލައަކީ، މާލީ އަހަރު ލިބުނު ފައިސާއާއި ކުރި ހަރަދުގެ ގޮތުގައި މާލީ ބަޔާންތަކުގައި ހިމަނާފައިވާ އަދަދުތަކާއި، ކައުންސިލްގެ ރިކޯޑުތަކުން ދައްކާ އަދަދުތަކާ ދެމެދު ހުރި ބޮޑެތި ފަރަގުތަކެވެ. އެގޮތުން، 2022 ވަނަ އަހަރު ކައުންސިލަށް ލިބުނު ފައިސާގެ ގޮތުގައި ދައުލަތުގެ މާލީ ނިޒާމު "ވިޔަ މޮޑިއުލް" އިން ދައްކާ އަދަދާއި، މާލީ ބަޔާނުގައި ހިމަނާފައިވާ އަދަދާ ދެމެދު 2.2 މިލިއަން ރުފިޔާގެ ފަރަގެއް ހުރިކަން ވަނީ ފާހަގަކޮށްފައެވެ. އަދި ހަރަދުގެ ގޮތުގައި ހިމަނާފައިވާ އަދަދާއި ވިޔަ މޮޑިއުލްއިން ދައްކާ އަދަދާ ދެމެދު 625،365 ރުފިޔާގެ ފަރަގެއް ހުރިކަމަށް ރިޕޯޓުގައި ބުނެފައިވެއެވެ.
މީގެ އިތުރުން، 2022 ވަނަ އަހަރު ނިމުނުއިރު ކައުންސިލްގެ ބޭންކް އެކައުންޓްތަކާއި ތިޖޫރީގައި 11.5 މިލިއަން ރުފިޔާ ހުރިކަމަށް ބޭންކް ސްޓޭޓްމަންޓްތަކުން ދެއްކި ނަމަވެސް، މާލީ ބަޔާނުގައި އެ އަހަރު ނިމުނު އިރު ހުރި ފައިސާގެ ގޮތުގައި ހިމަނާފައި ވަނީ ނެގެޓިވް ބެލެންސެކެވެ. މިއީ މާލީ ބަޔާން ތައްޔާރުކުރުމުގައި ހަދާފައިވާ ބޮޑު ގޯހެއްގެ ގޮތުގައި އޮޑިޓް ރިޕޯޓުގައި ބުނެފައިވެއެވެ.
މި މައްސަލަތައް ހައްލުކުރުމަށްޓަކައި، ދައުލަތުގެ މާލިއްޔަތުގެ ގަވާއިދާއި ފިނޭންސް މިނިސްޓްރީގެ އުސޫލުތަކާ އެއްގޮތަށް މާލީ ބަޔާންތައް ތައްޔާރުކުރުމަށާއި، ކައުންސިލްގެ ހުރިހާ މާލީ މުއާމަލާތްތަކެއް "ވިޔަ މޮޑިއުލް" މެދުވެރިކޮށް ކުރުމަށް އޮޑިޓާ ޖެނެރަލް ވަނީ ބާރަށު ކައުންސިލަށް ލަފާދެއްވާފައެވެ.
