މާލެ ވިޔަފާރި ބަނދަރަށް އެތެރެކުރާ އަވަހަށް ހަލާކުވާ ޒާތުގެ ކާބޯތަކެތީގެ ބާވަތްތައް (ޕެރިޝަބަލް މުދާ) ބާޒާރަށް ނެރުން އަވަސްކުރުމުގެ ގޮތުން، އެފަދަ މުދާ ކްލިއަރ ކުރުމުގެ މަސައްކަތް މިއަދުވެސް މެދުނުކެނޑި ކުރިއަށްދާނެ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނެފިއެވެ.
އެމްޕީއެލްއިން މައުލޫމާތު ދޭ ގޮތުގައި، ޕެރިޝަބަލް މުދާ ކްލިއަރ ކުރުމަށް އެކުންފުނިން ގެންގުޅޭ ޚާއްސަ އުސޫލުގެ ދަށުން މިއަދު މެންދުރުފަހު 15:30 އިން ފެށިގެން މިރޭގެ 23:30 އާ ހަމައަށް އެ މަސައްކަތް ބަނދަރުގައި ކުރިއަށްދާނެއެވެ. މިއީ ބާޒާރުގައި ކާބޯތަކެތީގެ ސަޕްލައި މެދުނުކެނޑި ހިފެހެއްޓުމަށާއި، މުދާ ހަލާކުވުމުގެ ކުރިން ވިޔަފާރިވެރިންނަށް ފޯރުކޮށްދިނުމަށް އެޅި ފިޔަވަޅެކެވެ.
ވިޔަފާރި ބަނދަރުގެ ތަފާސްހިސާބުތަކަށް ބަލާއިރު، ނިމިދިޔަ ހަފްތާއަކީ ބަނދަރުގެ އޮޕަރޭޝަންތައް ވަރަށް ބާރުބޮޑުކޮށް ދިޔަ ހަފްތާއެކެވެ. އެގޮތުން ވޭތުވެދިޔަ ހަތް ދުވަހުގެ ތެރޭގައި އެމްޕީއެލްއިން ވަނީ 1,823 ޓީއީޔޫސްގެ މުދާ އަންލޯޑްކޮށް، 1,692 ޓީއީޔޫސް ލޯޑްކޮށްފައެވެ.
ޚާއްސަކޮށް އަވަހަށް ހަލާކުވާ ޒާތުގެ މުދަލަށް އިސްކަންދީގެން ކުރި މަސައްކަތުގެ ތެރެއިން، މިދިޔަ ހަފްތާގައި އެކަނިވެސް ޕެރިޝަބަލް މުދަލުގެ 51,528 ޕެކޭޖު ބަނދަރުން ވަނީ ކްލިއަރކޮށްފައެވެ. އެމްޕީއެލްގެ އަމާޒަކީ ބަނދަރުގެ ޚިދުމަތްތައް ވީހާވެސް ހަލުވިކޮށް، ރައްޔިތުންނަށް ބޭނުންވާ ޒަރޫރީ މުދާ ފަސޭހަކަމާއެކު ލިބޭނެ އިންތިޒާމު ހަމަޖެއްސުމެވެ.
