މޯލްޑިވްސް ޒަކާތު ހައުސްއިން މިއަހަރުގެ މުދަލު ޒަކާތުގެ ގޮތުގައި ބޮލަކަށް 5،500 ދިވެހި ރުފިޔާ ބަހައިފިއެވެ.
މިއީ މިހާތަނަށް ރާއްޖޭގައި މުދަލު ޒަކާތުގެ ގޮތުގައި ބޮލަކަށް ބެހުނު އެންމެ ގިނަ ފައިސާކަމަށް އެ އިދާރާއިން ހާމަކުރެއެވެ.
ޒަކާތު ހައުސްއިން ބުނި ގޮތުގައި، 2025 ވަނަ އަހަރުގެ މުދަލު ޒަކާތް ބަހާފައިވަނީ 1447 ވަނަ އަހަރުގެ ހައްޖުމަހުގެ 1 ވަނަ ދުވަހާ ހަމައަށް ފަގީރުންނާއި މިސްކީނުންގެ ދަފުތަރުގައި ރަޖިސްޓަރީވެފައިވާ ފަރާތްތަކަށެވެ. އެގޮތުން ޖުމުލަ 2،384 މީހުންނަށް މި ފައިސާ މިހާރު ވަނީ ޖަމާކޮށްދީފައެވެ.
މި ފަހަރު މުދަލު ޒަކާތުގެ ގޮތުގައި ބެހި ފައިސާގެ ޖުމުލަ އަދަދަކީ 13,112,000 ރުފިޔާއެވެ. ޒަކާތު ހައުސްއިން ފާހަގަކުރި ގޮތުގައި މިއަހަރު ބޮލަކަށް ޖެހުނު މިންވަރަކީ މިދިޔަ އަހަރާ އަޅާބަލާއިރު އިތުރު އަދަދެކެވެ.
މުދަލު ޒަކާތުގެ ގޮތުގައި ބޮލަކަށް 5،500 ރުފިޔާ ބަހާފައި މިވަނީ، ފަގީރުންނާއި މިސްކީނުންގެ ދިރިއުޅުމުގެ ފެންވަރު މަތިކުރުމަށާއި، ޝަރުއީ ހަމަތަކުގެ މަތިން ޒަކާތުގެ ބެލެނިވެރިކަން ފޯރުކޮށްދިނުމަށް ސަރުކާރުން ކުރަމުންދާ މަސައްކަތްތަކުގެ ދަށުންނެވެ. މި ފައިސާ ފަގީރުންގެ އެކައުންޓްތަކަށް މިހާރު ޖަމާކޮށް ނިމިފައިވާ ކަމަށްވެސް އެ އިދާރާއިން ބުނެއެވެ.
