މި އަހަރުގެ މިހާތަނަށް މުދަލު ޒަކާތުގެ ގޮތުގައި ބަލައިގަތް އަދަދު، 2025 ވަނަ އަހަރު މުޅިއެކު ލިބުނު ޖުމުލަ އަދަދަށް ވުރެ އިތުރުވެއްޖެއެވެ.
މޯލްޑިވްސް ޒަކާތު ހައުސްއިން މިއަދު އާންމުކުރި ތަފާސްހިސާބުތައް ދައްކާގޮތުން މިއަހަރުގެ ސެޕްޓެމްބަރު މަހުގެ ނިޔަލަށް 109 މިލިއަނަށް ވުރެ ގިނަ ދިވެހި ރުފިޔާ ވަނީ ބަލައިގަނެފައެވެ.
މިއީ 2025 ވަނަ އަހަރު އެއްކޮށް ލިބުނު 106,456,071.00 ރުފިޔާއަށް ވުރެ 2,805,954.69 ރުފިޔާ އިތުރު އަދަދެކެވެ. މިއަހަރުގެ މިހައި ތަނަށް މުދަލު ޒަކާތުގެ ގޮތުގައި ލިބުނު އަދަދަކީ 2025ވަނަ އަހަރު ބަލައިގަތް ޖުމުލަ އަދަދާ އަޅާބަލާ އިރު ގާތްގަނޑަކަށް 2.54 ޕަސެންޓްގެ ކުރިއެރުމެކެވެ.
މި އަހަރުގެ ސެޕްޓެމްބަރު 30ގެ ނިޔަލަށް ދިވެހި ރުފިޔާއިން ޖުމްލަ 108,739,116.62 ރުފިޔާ ލިބިފައިވާއިރު، 34,021.41 ޔޫއެސް ޑޮލަރު ވެސް ވަނީ ލިބިފައެވެ.
މިދިޔަ އަހަރުގެ ޖުމުލަ އަދަދު ފަހަނަޅައި ގޮސްފައި މިވަނީ މި އަހަރު ނިމެން އަދި ތިން މަސްދުވަސް ބާކީ އޮއްވައެވެ. އެހެންކަމުން އޮކްޓޫބަރު މަހުން ފެށިގެން ޑިސެންބަރު މަހުގެ ނިޔަލަށް ލިބޭ ފައިސާ އަދި މި އަހަރުގެ ޖުމުލަ ޢަދަދަށް އިތުރުވާނެއެވެ.
