ހުޅުމާލޭގައި ހުންނަ އަމާން ދޯދި ފްލެޓެއް ކުއްޔަށް ދިނުމަށް، ޓިކްޓޮކްގައި މަޝްހޫރު ޝެހެނާޒް މޫސާ އިޝްތިހާރެއް ޖެހި މައްސަލަ ފެން މަތިވެއްޖެއެވެ.
ޝެހެނާޒް ސޯޝަލް މީޑިއާގައި ޖަހާފައިވާ ޕޯސްޓުގައި ބުނެފައިވަނީ އެ ފްލެޓުގައި އަދި އެއްވެސް ފަރުނީޗަރެއް ނެތްކަމަށާއި އެހެންނަމަވެސް ބަދިގޭގެ ފަރުނީޗަރު ހަދާފައިވާ ކަމަށެވެ. މަހަކު 23،000 ރުފިޔާ އަށް ކުއްޔަށް ދޫކުރުމަށް ނިންމާފައިވާ މި ފްލެޓާއި ބެހޭ މައުލޫމާތު ސާފުކުރުމަށް ގުޅި މީހަކު ސޯޝަލް މީޑިއާގައި ކުރި ޕޯސްޓެއްގައި ބުނީ މިއީ އަމާން ދޯދި ފްލެޓެއް ކަމަށެވެ.
ފަހި ދިރިއުޅުން ކޯޕަރޭޝަންގެ މެނޭޖިން ޑިރެކްޓަރު، ހަމްދާން ޝަކީލް ޓެގްކޮށް ޖަހާފައިވާ މި ޕޯސްޓާ ގުޅިގެން ހަމްދާން ވިދާޅުވީ، އެކަން އޭނާގެ ސަމާލުކަމަށް އައިސްފައިވާކަމަށެވެ. އަދި އެކަން ބެލުމަށް އޭނާގެ ޓީމަށް އަންގާފައިވާނެ ކަމަށް ހަމްދާން ވިދާޅުވިއެވެ.
އެފްޑީސީގެ ފްލެޓްތަކަކީ އާމްދަނީ ހޯދުމަށް ކުއްޔަށް ދިނުމަށް ދޫކޮށްފައިވާ ތަންތަން ނޫން ކަން ފާހަގަކޮށް ހަމްދާން ވިދާޅުވީ ކުއްޔަށް ދިނުމުން އެފްޑީސީ އާއި އެތަން ލިބިފައިވާ ފަރާތާއި ދެމެދު ހެދިފައިވާ އެއްބަސްވުމާއި އެފަރާތުން ހިލާފުވެފައިވާ ކަމަށެވެ. އަދި އެގޮތަށް ކުއްޔަށް ދޭ ފަރާތްތައް 50،000 ރުފިޔާއިން ޖޫރިމަނާކޮށް އެތަން ކުއްޔަށް ދޫކުރާ ފަރާތް ނުވަތަ އެތަނުގެ ވެރިފަރާތާއެކު ވެފައިވާ އެއްބަސްވުން ވަގުތުން ބާތިލުކުރާނެކަމަށް ހަމްދާން ވިދާޅުވިއެވެ.
އިތުރަށް ހަމްދާން ވިދާޅުވީ އެފަދަ ފްލެޓްތައް އެގޮތަށް ކުއްޔަށް ދިނުމަކީ ގޯހެއް ކަމަށާއި އެކަމުގެ ސަބަބުން ގެދޮރު އިމާރާތް ކުރުމުގެ މަޝްރޫއުތަކުގެ މަގުސަދު ގެއްލޭ ކަމަށެވެ. އަދި އެތަންތަން ކުއްޔަށް ދޫކޮށް އާމްދަނީ ލިބޭ ތަންތަނަށް އެތަންތަން ބަދަލު ކުރުމަކީ ކޮންމެ ދިވެއްސެއްގެ ވެސް ހައްގު ނިގުޅައިގަތުން ކަމަށް ހަމްދާން ވަނީ ސިފަކޮށްފައެވެ.
މައުލޫމާތު ލިބިފައިވާ ގޮތުން އެތަން ކުއްޔަށް ދޭން ޝެހެނާޒް ޖަހާފައިވާ ފޯނު ނަންބަރަކީ އޭނާގެ ގާތް އެކުވެރިއެއްކަމުގައި މަރިޔަމް ރުހުޝާ ބޭނުން ކުރަމުން އަންނަ ނަންބަރެކެވެ.
