މުޅި ގައުމުގެ ކުރިމަގާ ތަރައްގީއަށް ރައީސް ޑރ.މުހައްމަދު މުއިއްޒުގެ ވަރަށް ބޮޑު ތަސައްވުރެއް އެބައޮތް ކަމަށާއި، އެ ތަސައްވުރުގައި އެންމެ ބޮޑު އިސްކަމެއް ދެއްވާ ސިޓީ އަކީ އައްޑޫކަމުގައި ފިޝަރީޒް މިނިސްޓަރު އަހްމަދު ޝިޔާމް ވިދާޅުވެއްޖެއެވެ.
ރޭ މާލޭގައި ލޯކަލް ކައުންސިލް އަދި އަންހެނުންގެ ތަރައްގީއަށް މަސައްކަތްކުރާ ކޮމިޓީގެ އިންތިހާބުގައި ވާދަކުރާ އައްޑޫ ސިޓީ ކެންޑިޑޭޓުންގެ އޮފީސް ހުޅުވުމަށް ބޭއްވި ރަސްމިއްޔާތުުގައި ޝިޔާމް ވިދާޅުވީ އައްޑޫގައި ހުރި ޒަމާންވީ ބޮޑެތި މައްސަލަތައް ހައްލުކުރަން ރާވާފައިވާ ކަންކަން ރައީސްގެ މެނިފެސްޓޯގައި އެބަހުރި ކަމަށެވެ.
އެހެންނަމަވެސް އެމްޑީޕީ ސަރުކާރުން ދިޔައީ ވަތްގަނޑު ހުސްކޮށްލާފައި ކަމަށްވާތީ ކަންކަން ކުރުމުގައި ދަތިތަކެއް އެބަހުރި ކަމަށެވެ.
މިއީ ރާއްޖޭގެ ހުރިހާ ހިސާބެއްގައި ހިންގާ ތަރައްގީގެ މަޝްރޫއުތަކުގައި ކުލަޖެހޭނެ އަހަރެއްކަން ފާހަގަކުރަމުން ޝިޔާމް ވިދާޅުވީ ވެރިކަމާ ހަވާލުވެ ވަޑައިގެން ކަންކަން ތަރުތީބުކުރެއްވީ އެގޮތަށް ކަމަށެވެ. އޭގެ ތެރޭގައި އައްޑޫގެ ތަރައްގީއަށް ބޭނުންވާ މާލީ ކަންކަން ހަމަޖެއްސުންވެސް ހިމެނޭކަން މިނިސްޓަރު ފާހަގަކުރެއްވިއެެވެ.
މީގެ އިތުރުން ޝިޔާމް ވަނީ އަންނަމަހު ބާއްވާ ކައުންސިލް އިންތިހާބާ ޑަބްލިއުޑީސީ އިންތިހާބުގެ މެޖޯރިޓީ ޕީއެންސީއަށް ދީފިނަމަ އައްޑޫއިން ތަފާތު ފެންނާނެ ކަމުގެ ޔަގީންކަން ދެއްވާފައެވެ.
