މަރުކަޒީ ބޭންކް، އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް (އެފްއައިޔޫ) ގެ އިސް ވެރިޔާ މުހައްމަދު އިޝާން މިއަދު އައްޔަން ކޮށްފިއެވެ.
އެ މަގާމަށް އޭނާ އައްޔަން ކުރީ އެފްއައިޔޫގެ އިސްވެރިއަކަށް އެންމެފަހުން ހުންނެވި އިސްމާއިލް ސާޖިދު މަގާމުން ވަކިކުރުމަށްފަހު އެ މަގާމަށް ކުރިމަތިލާން އެމްއެމްއޭގެ މުވައްޒަފުންގެ ތެރެއިން ހުޅުވާލުމުން އެ މަގާމަށް ކުރިމަތިލި ފަރާތްތަކުގެ ތެރެއިން އިންޓަވިއުކޮށްގެންނެވެ.
އިޝާނަކީ އިނގިރޭސިވިލާތުގެ ޗާޓަޑް އިންސްޓިޓިއުޓް އޮފް މެނޭޖްމަންޓް އެކައުންޓަންޓްސް (ސީއައިއެމްއޭ)ގެ އެސޯސިއޭޓް މެންބަރެއްގެ އިތުރުން އިންސްޓިޓިއުޓް އޮފް ޗާޓަޑް އެކައުންޓަންޓްސް އޮފް ދަ މޯލްޑިވްސްގެ އެފިލިއޭޓް މެންބަރެކެވެ.
އިޝާން އެމްއެމްއާ ގުޅީވަޑައިގަތްތާ 12 އަހަރު ވެފައިވާ އިރު އޭނާ ވަނީ އެ އިސް އެކި މަގާމުތައް ފުރުއްވާފައެވެ. އޭގެ ތެރޭގައި ހެޑް އޮފް ކޯޕަރޭޓް އެކައުންޓްސް ސެކްޝަނާއި ހެޑް އޮފް ފައިނޭންޝަލް ކޮންޓްރޯލްސް ޑިވިޝަން ގެ އިސް މަގާމުތައް ހިމެނެއެވެ.
ފައިނޭންޝަލް އިންޓެލިޖެންސް ޔުނިޓަކީ މަނީ ލޯންޑަރިން އަދި ޓެރަރިޒަމަށް ފައިނޭންސްކުރުން ހުއްޓުވުމުގެ ގާނޫނުގެ ދަށުން އުފެދިފައި އޮންނަ ހާއްސަ ޔުނިޓެކެވެ. ގާނޫނުގައިވާ ގޮތުން ފައިނޭންޝަލް އިންޓެލިޖެންސް ޔުނިޓުގެ އިސްވެރިޔާ އައްޔަންކުރުމާއި ވަކިކުރުމުގެ ބާރު ލިބިގެންވަނީ މަރުކަޒީ ބޭންކުގެ ގަވަރުނަރަށެވެ.
މިދިޔަ އޮގަސްޓް މަހުގައި އެފްއައިޔޫގެ ވެރިޔަކަށް އައްޔަން ކުރި ސާޖިދު އެ މަގާމުން ވަކިކޮށްފައި ވަނީ އެމްއެމްއޭގައި އުޅެ މުވައްޒަފަކަށް ޖިންސީ ފުރައްސާރަ ކުރި މައްސަލައަކާ ގުޅިގެންނެވެ. ނަމަވެސް އެކަމަށް އޭނާ ވަނީ އިންކާރުކޮށްފައެވެ.
