ބ. އަތޮޅު ޕްރޮމޯޓުކުރުމަށާއި އިންޑޮނޭޝިއާގެ ލާމަރުކަޒީ ނިޒާމް ހިނގާ ގޮތް ބަލާ ތަޖުރިބާ ހޯދުމަށް ބ. އަތޮޅު ކައުންސިލުން ކުރި ދަތުރަށް ބޮޑު ހަރަދެއް ކޮށްފައިވާކަމަށާއި މިއީ ދައުލަތުގެ ހަރަދު ކުޑަކުރުމުގެ ސާކިއުލާއާ ހިލާފަށް ކޮށްފައިވާ ހަރަދެއް ކަމަށް އޮޑިޓް އޮފީހުން އާންމުކުރި ރިޕޯޓުން ދައްކައިފިއެވެ.
ބ އަތޮޅު ކައުންސިލް އިދާރާގެ 2023 އަދި 2024 ވަނަ އަހަރުގެ ކޮމްޕްލަޔަންސް ރިޕޯޓުގައި ބުނާ ގޮތުގައި، ބ. އަތޮޅު ޕްރޮމޯޓުކޮށް އިންޑޮނޭޝިއާގެ ލާމަރުކަޒީ ނިޒާމް ހިނގާ ގޮތް ބަލާ ތަޖުރިބާ ހޯދުމަށް، ބ. އަތޮޅު ކައުންސިލުން 2025 ވަނަ އަހަރުގެ އޭޕްރީލް މަހު އިންޑޮނޭޝިއާގެ ބާލީއަށް ކުރި ދަތުރަށް 562,471 ރުފިޔާ ވަނީ ހަރަދުކޮށްފައެވެ.
10 ދުވަހުގެ މުއްދަތަށް ކުރި މި ތަޖުރިބާ ދަތުރުގައި އަތޮޅު ކައުންސިލް އިދާރާ ތަމްސީލުކުރާ 12 މެންބަރުންނާއި ބިއުރޯ މުވައްޒަފެއްގެ އިތުރުން ސެކްރެޓަރީ ޖެނެރަލް ހިމެނޭހެން ޖުމުލަ 14 މެމްބަރުން ބައިވެރިވެފައިވާކަމަށް އޮޑިޓް ރިޕޯޓުގައި ފާހަގަކޮށްފައިވެއެވެ. މި ދަތުރަށް ކުރި ހަރަދަކީ ދައުލަތުގެ ހަރަދު ކުޑަކުރުމަށް ރައީސް ޑރ. މުހައްމަދު މުއިއްޒު ނިންމެވި ކަންކަން ތަންފީޒުކުރުމަށް ލޯކަލް ގަވަމެންޓު މިނިސްޓްރީން ނެރުނު ސާކިއުލާގައި އަންގާފައިވާ އެންގުމާއި ހިލާފަށް ކޮށްފައިވާ ހަރަދެއްކަމަށްވެސް ވަނީ ބަޔާންކޮށްފައެވެ.
އިތުރަށް މި ރިޕޯޓުގައި ވަނީ ފިލިޕީންސްގެ އިދާރީ ނިޒާމާއި، އެގައުމުގެ ސަރުކާރުން ހިންގާ ޕްރޮގްރާމްތައް ބަލާ ދިރާސާކުރުމަށް 2023 ވަނަ އަހަރުވެސް ބ. އަތޮޅު ކައުންސިލުން ފިލިޕީންސްއަށް 10 ދުވަހުގެ ދަތުރެއް ކޮށްފައިވާކަމަށާއި، މި ދަތުރަށްވެސް 691،018 ރުފިޔާ ހަރަދުކޮށްފައިވާކަމަށެވެ. މިއީވެސް ދައުލަތުގެ ހަރަދުތައް ކޮންޓްރޯލް ކުރުމުގެ އެފިޝިއެންސީއާއި ހިލާފަށް ކޮށްފައިވާ ހަރަދެއްކަމަށް ރިޕޯޓުގައި ވަނީ ބުނެފައެވެ.
މީގެއިތުރުން ކައުންސިލް އިދާރާއިން ކުޅިވަރުތަކަށާއި، އަތޮޅު ފެންވަރުގައި ރަށްތައް ތަރައްގީ ކުރުމަށާއި ޓްރެއިނިންތައް ހިންގުމަށް ފާސްކުރި ބަޖެޓުގައި ހިމަނާފައި ވީނަމަވެސް، ބަޖެޓުކޮށްފައިވާ ބައެއް ހަރަކާތްތައް މާލީ އަހަރުގެ ނިޔަލަށް ނިމިފައި ނުވާކަމަށްވެސް އޮޑިޓް ރިޕޯޓުގައި ބަޔާންކޮށްފައިވެއެވެ.
އިތުރަށް އޮޑިޓް ރިޕޯޓުގައި ބ. އަތޮޅުގެ ރަށްތަކުގެ ކުނި މެނޭޖުކުރުމަށް ބޭނުންވާ ތަކެތި ހޯދަން 4،690،500 ރުފިޔާއަށް އެއްބަސްވުމެއްގައި ސޮއިކޮށްފައިވާކަމަށާއި ނަމަވެސް މިތަކެތި ފޯރުކޮށްދޭން ޖެހޭ މުއްދަތުގައި ފޯރުކޮށްދީފައިނުވާތީ މި އެއްބަސްވުން ބާތިލުކޮށްފައިވާ ކަމަށެވެ. އެއްބަސްވުން ބާތިލުކުރިއިރު އެޑްވާންސްގެ ގޮތުގައި ދައްކާފައިވާ 703،575 ރުފިޔާ ހޯދާފައި ނުވާކަމަށްވެސް ރިޕޯޓުގައި ވަނީ ބުނެފައެވެ.
