މިދިޔަ ބުރާސްފަތި ދުވަހުގެ ނިޔަލަށް ދައުލަތަށް ލިބުނު ޓެކްސް އާމްދަނީ، މިދިޔަ އަހަރުގެ އެ މުއްދަތާ އަޅާބަލާއިރު 7.0 ޕަސެންޓް އިތުރުވެފައިވާ ކަމަށް މިނިސްޓްރީ އޮފް ފައިނޭންސް އެންޑް ޕަބްލިކް އެންޓަޕްރައިޒަސްއިން ހާމަކޮށްފިއެވެ.
މިނިސްޓްރީން އެންމެ ފަހުން އާންމުކޮށްފައިވާ "ވީކްލީ ފިސްކަލް ޑިވެލޮޕްމަންޓްސް" ރިޕޯޓުގައިވާ ގޮތުން، މި އަހަރުގެ މިހާތަނަށް ޓެކްސް އާމްދަނީގެ ގޮތުގައި 24.63 ބިލިއަން ރުފިޔާ ވަނީ ލިބިފައެވެ. މިއީ 2025 ވަނަ އަހަރުގެ އެ މުއްދަތުގައި ލިބުނު 23.03 ބިލިއަން ރުފިޔާއާ އަޅާބަލާއިރު ފާހަގަކޮށްލެވޭ ކުރިއެރުމެކެވެ. މީގެއިތުރުން، ދައުލަތަށް ލިބުނު ޖުމްލަ އާމްދަނީ އާއި ހިލޭ އެހީގެ މިންވަރު 2.6 ޕަސެންޓް އިތުރުވެ، ވަނީ 31.89 ބިލިއަން ރުފިޔާއަށް އަރާފައެވެ.
ޓެކްސް އާމްދަނީއަށް މި ކުރިއެރުން ލިބިފައިވަނީ މައިގަނޑު ގޮތެއްގައި އާންމު މުދަލާއި ހިދުމަތުގެ އަގުން ނަގާ ޓެކްސް (ޖީޖީއެސްޓީ) އަދި ރާއްޖޭގައި ވަޒަންވެރިނުވާ ފަރާތްތަކުގެ އަތުން ނަގާ ވިތުހޯލްޑިންގ ޓެކްސްގެ އިތުރުން އެހެނިހެން މުހިންމު ދާއިރާތަކުން ލިބުނު އާމްދަނީ ރަނގަޅުވުމުންނެވެ.
އެގޮތުން، ޖީޖީއެސްޓީގެ ގޮތުގައި ލިބުނު އާމްދަނީ 8.2 ޕަސެންޓް އިތުރުވެ 4.43 ބިލިއަން ރުފިޔާއަށް އަރާފައިވާއިރު، މިދިޔަ އަހަރު މި އަދަދު ހުރީ 4.09 ބިލިއަން ރުފިޔާގައެވެ. ހަފުތާއެއްގެ ތެރޭގައި ދައުލަތުގެ އާމްދަނީއަށް އެންމެ ބޮޑު ކުރިއެރުމެއް ގެނެސްދިނީ ޖީޖީއެސްޓީން ކަމަށްވުމުން، އެތެރޭގެ އާމްދަނީ ހޯދުމުގައި މި ޓެކްސްގެ މުހިންމުކަން ވަނީ ސާބިތުވެފައެވެ.
މީގެއިތުރުން، ރާއްޖޭގައި ވަޒަންވެރިނުވާ ފަރާތްތަކުގެ އަތުން ނަގާ ވިތުހޯލްޑިންގ ޓެކްސްގެ އާމްދަނީ 10.4 ޕަސެންޓް އިތުރުވެ 1.09 ބިލިއަން ރުފިޔާއަށް އަރާފައިވެއެވެ. އަދި އިމްޕޯޓް ޑިއުޓީ 15.2 ޕަސެންޓް އިތުރުވެ 2.79 ބިލިއަން ރުފިޔާއަށް އަރާފައިވާއިރު، ކޯޕަރޭޓް އިންކަމް ޓެކްސް 9.2 ޕަސެންޓް އިތުރުވެ 3.01 ބިލިއަން ރުފިޔާއަށް ވަނީ މަތިވެފައެވެ. ވިޔަފާރި އާއި މުދަލުން ނަގާ އެހެނިހެން ޓެކްސްތަކުން ލިބުނު އާމްދަނީ 87.8 ޕަސެންޓްއިގެ ބޮޑު ކުރިއެރުމަކާއެކު 1.39 ބިލިއަން ރުފިޔާއަށް އަރާފައިވާއިރު، އެއާޕޯޓް ސާވިސް ޗާޖާއި ޑިޕާޗަރ ޓެކްސް 8.8 ޕަސެންޓް އިތުރުވެ 1.55 ބިލިއަން ރުފިޔާ ވަނީ ލިބިފައެވެ. އަދި މުދަލުން ލިބުނު އާމްދަނީ 12.1 ޕަސެންޓް އިތުރުވެ 1.97 ބިލިއަން ރުފިޔާއަށް އަރާފައިވާއިރު، ހިލޭ އެހީގެ ގޮތުގައި ލިބުނު މިންވަރު ވަނީ 68.1 ޕަސެންޓް އިތުރުވެ 0.52 ބިލިއަން ރުފިޔާއަށް އުފުލިފައެވެ.
އާމްދަނީ އިތުރުވި ނަމަވެސް، ދައުލަތުގެ ހަރަދުތަކަށް ވެސް ވަނީ ބޮޑެތި އިތުރުވުންތަކެއް އައިސްފައެވެ. 15 އޮކްޓޫބަރުގެ ނިޔަލަށް ދައުލަތުގެ ޖުމްލަ ހަރަދު 36.39 ބިލިއަން ރުފިޔާއަށް އަރާފައިވާއިރު، މިއީ މިދިޔަ އަހަރަށްވުރެ 16.9 ޕަސެންޓްއިގެ އިތުރުވުމެކެވެ. މިއާއެކު ދައުލަތުގެ ބަޖެޓުގެ އޯވަރޯލް ޑެފިސިޓް ވަނީ 4.50 ބިލިއަން ރުފިޔާއަށް އަރާފައެވެ.
ހަރަދުތަކުގެ ތަފްސީލަށް ބަލާއިރު، ރިކަރަންޓް ހަރަދު 17.2 ޕަސެންޓް އިތުރުވެ 31.35 ބިލިއަން ރުފިޔާއަށް ވަނީ އަރާފައެވެ. މީގެ ތެރޭގައި އިދާރީ ހިދުމަތްތަކަށް 2.04 ބިލިއަން ރުފިޔާ (6.0 ޕަސެންޓް އިތުރު)، އަދި މުވައްޒަފުންގެ މުސާރަ އާއި އިނާޔަތްތަކަށް 5.56 ބިލިއަން ރުފިޔާ (14.1 ޕަސެންޓް އިތުރު) ހިމެނެއެވެ. އެހެން ނަމަވެސް، ދަރަނީގެ އިންޓަރެސްޓަށް ކުރި ހަރަދު ވަނީ 6.6 ޕަސެންޓް ދަށަށް ގޮސްފައެވެ.
ހިނގަމުންދާ އެހެނިހެން ހަރަދުތަކުގެ ތެރެއިން ހިލޭ އެހީ އާއި ސަބްސިޑީއަށް ކުރި ހަރަދު 39.1 ޕަސެންޓް އިތުރުވެ 10.45 ބިލިއަން ރުފިޔާއަށް އަރާފައިވެއެވެ. މީގެ ތެރެއިން ސަބްސިޑީއަށް ކުރި ހަރަދު 73.3 ޕަސެންޓްއިގެ ބޮޑު މިންވަރަކުން އިތުރުވެ 4.31 ބިލިއަން ރުފިޔާއަށް އަރާފައިވާއިރު، އާސަންދައަށް ކުރި ހަރަދު 16.9 ޕަސެންޓް އިތުރުވެ 1.92 ބިލިއަން ރުފިޔާއަށް ވަނީ މަތިވެފައެވެ.
ކެޕިޓަލް ހަރަދުތަކަށް ބަލާއިރު، ޖުމްލަ ކެޕިޓަލް ހަރަދު 15.2 ޕަސެންޓް އިތުރުވެ 5.04 ބިލިއަން ރުފިޔާއަށް އަރާފައިވެއެވެ. މީގެ ތެރޭގައި ބިމާއި އިމާރާތްތަކަށް ކުރި ހަރަދު 38.9 ޕަސެންޓް އިތުރުވެ 1.57 ބިލިއަން ރުފިޔާއަށް އަރާފައިވާއިރު، އެހެނިހެން އުމްރާނީ ވަސީލަތްތަކަށް ކުރި ހަރަދު 27.6 ޕަސެންޓް އިތުރުވެ 0.96 ބިލިއަން ރުފިޔާއަށް ވަނީ އަރާފައެވެ. އަދި ބަނދަރުތައް ތަރައްގީކުރުމަށް ކުރި ހަރަދު 25.5 ޕަސެންޓް، އަދި ކެޕިޓަލް އިކުއިޕްމަންޓް ހޯދުމަށް ކުރި ހަރަދު 22.0 ޕަސެންޓް ވަނީ އިތުރުވެފައެވެ.
