ރާއްޖޭގެ ފަތުރުވެރިކަމުގެ ސިނާއަތުން ލިބޭ ސީދާ މަންފާ އާންމު ރައްޔިތުންނަށް ފޯރުކޮށްދިނުމަށްޓަކައި ސަރުކާރު ކުންފުނިތައް މެދުވެރިކޮށް 10 ރިސޯޓު ތަރައްގީކުރުމަށް ނިންމާފައިވާ ނިންމުމަކީ މުޅި އިގުތިސާދީ އޮނިގަނޑަށް ބޮޑު ބަދަލެއް އަންނާނެ އުއްމީދީ މަޝްރޫއެއް ކަމަށް ފަތުރުވެރިކަމުގެ ސިނާއަތުގެ އެއް ބާނީ އަދި ކްރައުން ގްރޫޕުގެ ޗެއާމަން ހުސައިން އަފީފް ވިދާޅުވެއްޖެއެވެ.
ގައުމީ ފަތުރުވެރިކަމުގެ ދުވަހާ ގުޅުވައިގެން ބޭއްވި ހާއްސަ ޖަލްސާގައި ވާހަކަދައްކަވަމުން، ދާއިރާގައި ގިނަ ދުވަސްތަކެއްވަންދެން ހިދުމަތް ކުރައްވާފައިވާ އަފީފް ވިދާޅުވީ، އާންމު ރައްޔިތުންނަށް ހިއްސާވެވޭ ގޮތަށް ކުރިއަށްގެންދާ މި މަޝްރޫއަކީ އެބޭފުޅާ ވަރަށް ބޮޑަށް އުންމީދު ކުރައްވާ ކަމެއް ކަމަށެވެ. އަދި މިކަން ކާމިޔާބުކަމާއެކު ކުރިއަށްގެންދިއުމަށް ސަރުކާރަށް އެދިވަޑައިގަންނަވާ ކަމަށްވެސް އޭނާ ފާހަގަކުރެއްވިއެވެ.
ރާއްޖޭގައި ފަތުރުވެރިކަން ފެށުނުތާ 54 އަހަރު ވެފައިވާއިރު، މި ސިނާއަތުގެ ނަފާ ސީދާ ރައްޔިތުންގެ ޖީބަށް ވަންނާނެ ގޮތް ހެދުމަކީ ގައުމަށް އަންނާނެ ކުރިއެރުމެއްގެ ގޮތުގައި އަފީފް ސިފަކުރެއްވިއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާންކުރައްވާފައިވާ މި ސިޔާސަތުގެ ދަށުން، ކުރިއަށް އޮތް ތިން އަހަރު ތެރޭގައި ސަރުކާރު ކުންފުނިތައް މެދުވެރިކޮށް މަދުވެގެން 10 ރިސޯޓު ތަރައްގީކުރާނެއެވެ. މި ރިސޯޓުތަކުން ލިބޭ ފައިދާ ބޭރު ފައިސާއިން ސީދާ ރައްޔިތުންގެ އެކައުންޓުތަކަށް ޖަމާކޮށްދިނުމަށް ވަނީ ހަމަޖެހިފައެވެ.
މި އިންވެސްޓްމަންޓުގެ މަންފާ 2030 ވަނަ އަހަރުން ފެށިގެން ރައްޔިތުންނަށް ކުރާނެ ކަމަށާއި، އެވްރެޖުކޮށް ކޮންމެ ރައްޔިތަކަށް އަހަރަކު މަދުވެގެން 400 ޑޮލަރު ލިބިގެންދާނެ ކަމަށް ސަރުކާރުން ވަނީ ހާމަކޮށްފައެވެ.
މި މަޝްރޫއު އަމަލީގޮތުން ކުރިއަށްގެންދިއުމަށްޓަކައި ސަރުކާރު ކުންފުނިތަކަށް ފަތުރުވެރިކަމުގެ ވިޔަފާރި ކުރެވޭނެ ގޮތަށް ޓޫރިޒަމް ގާނޫނަށް ބޭނުންވާ އިސްލާހުތައް އިގުރާރުކޮށް، މަޖިލީހުން ވަނީ ފާސްކޮށްފައެވެ.
