ހުޅުމާލޭގައި މޯލްޑިވްސް ގައްޖު ކޯޕަރޭޝަނުން ތަރައްގީކުރާ "ނިއަމް ރެސިޑެންސް" މަޝްރޫއު އެންމެ އިންސާފުވެރި އަދި ދެފުށް ފެންނަ ގޮތެއްގައި ކުރިއަށްގެންދިއުމުގެ ބޭނުމުގައި، އެ ކުންފުނީގެ މުވައްޒަފުންނަށް އެޕާޓްމަންޓުތައް ވިއްކުމަށް މިހާތަނަށް ކޮށްފައިވާ އެންމެހައި މުއާމަލާތްތައް ބާތިލުކުރުމަށް ނިންމައިފިއެވެ.
ހައްޖު ކޯޕަރޭޝަނުން މައުލޫމާތު ދެއްވާފައިވާ ގޮތުގައި، ހުޅުމާލޭގައި ތަރައްގީކުރާ މި ލަގްޒަރީ ހައުސިން މަޝްރޫއަކީ އެ ކޯޕަރޭޝަންގެ މާލީ ހާލަތު ރަނގަޅުކޮށް، ކުންފުންޏަށް އެންމެ ބޮޑު މާލީ ފައިދާއެއް ހޯދުމަށް ކުރިއަށްގެންދާ މުހިންމު މަޝްރޫއެކެވެ.
އެ ކޯޕަރޭޝަނުން ބުނީ، މި ޕްރޮޖެކްޓުގެ ތެރެއިން ތަރައްގީކުރެވޭ ކޮންމެ އެޕާޓްމަންޓު ޔުނިޓަކުން ކުންފުންޏަށް އެންމެ އެދެވޭ ފައިދާ ލިބޭނެހެން ކަންކަން ރޭވުމަށްޓަކައި، ޔުނިޓުތަކުގެ އަގުތައް އަލުން ކަނޑައެޅުމުގެ މަސައްކަތް މިހާރު ކުރަމުންދާ ކަމަށެވެ. އަދި މި މަސައްކަތްތައް ނިމުމުން، "ނިއަމް ރެސިޑެންސް" ގެ އެޕާޓްމަންޓްތައް ގަތުމުގެ ފުރުސަތު އާންމުކޮށް ހުޅުވާލާނެ ކަމަށް ވެސް އެ ކޯޕަރޭޝަނުން ހާމަކުރެއެވެ.
ހައްޖު ކޯޕަރޭޝަނުގެ މުވައްޒަފުންނަށް އެޕާޓްމަންޓުތައް ވިއްކަން ކުރިން ހިންގި މުއާމަލާތްތައް ބާތިލުކުރުމަށްފަހު، މި ޔުނިޓުތައް ވިއްކުމުގެ ކަންކަން ދެން ކުރިއަށްދާނީ އާންމުކޮށް ހުރިހާ ފަރާތްތަކަށް ހަމަހަމަ ފުރުސަތު ލިބޭނޭހެން ދެފުށް ފެންނަ އުސޫލަކުންނެވެ. އަދި މިފަދަ ނިންމުމެއް ނިންމާފައިމިވަނީ ނިއަމް ރެސިޑެންސްގެ ޕެންޓްހައުސްތައް އެ ކޯޕްރޭޝަނުގެ ވެރިންނަށް އަގުހެޔޮކޮށް ވިއްކަން ނިންމާފައިވާކަމަށް ބުނެ ކުރެވެންފެށި ތުހުމަތުތަކާއެކުއެވެ.
