ރާއްޖޭގައި ރެސިޑެންސީ ޕްރޮގްރާމެއް ހުޅުވާލުމަކީ އުސޫލީ ގޮތުން ރަނގަޅު ކަމެއް ކަމަށް ގަބޫލުކުރެއްވި ނަމަވެސް، ޔޫއޭއީގެ އީގަލް ހިލްސް ކުންފުންޏާއެކު ވެފައިވާ އެއްބަސްވުމުން ދައުލަތަށް ލިބެންޖެހޭ އެޑްވާންސް ފައިސާ ނުލިބޭތީ ކުރީގެ ރައީސް މުހައްމަދު ނަޝީދު ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ރައީސް ނަޝީދު ވިދާޅުވީ، އީގަލް ހިލްސްގެ އެއްބަސްވުން އަދިވެސް އާންމުކޮށްފައި ނުވާކަމަށާއި، މިހާތަނަށް ތިލަވެފައިވާ މައުލޫމާތުތަކުން ސަރުކާރުގެ ސިޔާސަތާމެދު ބޮޑެތި ސުވާލުތަކެއް އުފެދޭ ކަމަށެވެ. އެގޮތުން އެމަނިކުފާނު ފާހަގަކުރެއްވި އެންމެ ބޮޑު އެއް ކަންބޮޑުވުމަކީ މިވަރުގެ ބޮޑު މަޝްރޫއެއް ދޫކޮށްލާއިރު ދައުލަތަށް ލިބެންޖެހޭ އެޑްވާންސް ފައިސާ ނުލިބި އޮތުމެވެ.
މީގެ އިތުރުން ރައީސް ނަޝީދު ވިދާޅުވީ މި މަޝްރޫއު މާލެ ސަރަހައްދުގައި ކުރިއަށްގެންދިއުމަކީ މުޅި އިގްތިސާދު މާލެ ސަރަހައްދަށް ތިލަވެ ރަށްރަށުގެ އާބާދީ ހުސްވުމަށް މަގުފަހިވެގެންދާނެ ކަމެކެވެ.
މި މައްސަލައިގައި ސަރުކާރަށް އިރުޝާދު ދެއްވަމުން ނަޝީދު ވިދާޅުވީ، އެންމެ ރަނގަޅު ގޮތަކީ އީގަލް ހިލްސް އެއްބަސްވުން އަވަހަށް ރައްޔިތުންގެ މަޖިލީހަށް ފޮނުވުން ކަމަށެވެ. އަދި މަޖިލީހުގައި އޮތް ސަރުކާރުގެ ސުޕަ މެޖޯރިޓީ ބޭނުންކޮށްގެން މިފަދަ ރެސިޑެންސީ މަޝްރޫއުތަކަށް ބޭނުންވާ ގާނޫނީ އޮނިގަނޑު ސާފުކޮށް ފާސްކުރުމަށް ނަޝީދު ވަނީ ގޮވާލައްވާފައެވެ.
ދާދި ފަހުން ސަރުކާރުން ވަނީ ދުބާއީގެ އީގަލް ހިލްސްއާއެކު ރަސްމާލޭގައި ތަރައްގީކުރާ "މޯލްޑިވްސް ވޯޓަފްރޮންޓް އެންޑް މެރީނާ" މަޝްރޫއެއްގައި ސޮއިކޮށްފައެވެ. ރާއްޖޭގެ ތާރީހުގައި ވެސް ހިންގާ އެންމެ ބިޔަ، ބޭރުގެ އިންވެސްޓްމަންޓް މި މަޝްރޫއުގެ އަމަލީ މަސައްކަތް ފެށުމުގެ ކުރިން ވެސް އެޑްވާންސްކޮށް 5،000 ހައުސިން ޔުނިޓް ދައުލަތަށް ލިބޭކަމަށް ވަނީ ބުނެފައެވެ.
މި މަޝްރޫއުގެ ޕްރޮޕަޓީތައް ވިއްކައިގެން ލިބޭ ހުރިހާ ފައިސާއެއް ޖަމާވާނީ ސަރުކާރުގެ ކޮންޓްރޯލް އޮންނަ، ރާއްޖޭގައި ހުންނަ އެސްކްރޯ އެކައުންޓަކަށް ކަމަށް މީގެ ކުރިން ސަރުކާރުން ހާމަކޮށްފައި ވެއެވެ.
ނަޝީދުގެ އިތުރުން ކުރީގެ ރައީސް އަބްދުﷲ ޔާމީން ވަނީ ރަސްމާލެ ފަދަ ބޮޑު ބިމެއް ބަޔަކަށް ދިނުމަށް އެއްބަސްވުން ހެދުމުގެ ކުރިން ރައްޔިތުންގެ ފެންނަ ނުފެންނަ ވޯޓެއް ނަގަންޖެހޭނެ ކަމަށް ވިދާޅުވެފައެވެ. އެގޮތުން ރައްޔިތުންގެ ފެންނަ ނުފެންނަ ވޯޓެއް ނަގަންޖެހެނީ ހަމައެކަނި އިންތިހާބުތައް އެއްކޮށްލުމަށް ނޫން ކަމަށާއި، ގައުމުގެ ބޮޑެތި ނިންމުންތަކުގައި ވެސް ރައްޔިތުންގެ ހިޔާލު ހޯދަންޖެހޭނެކަމަށް ޔާމީން ވަނީ ވިދާޅުވެފައެވެ.
ރަސްމާލެ މަޝްރޫއުގެ ދަށުން 1,100 އަށްވުރެ ގިނަ ހެކްޓަރުގެ ބިން ހިއްކައި، 65,000 ހައުސިން ޔުނިޓް ގާއިމުކުރުމަށް ނިންމާފައިވާއިރު ޔާމީން ވިދާޅުވީ މިފަދަ ކަންކަމުގައި ރައީސުލްޖުމްހޫރިއްޔާއަށް ނޫނެކޭ ބުނުމަކީ ސަލާމަތީ ބާރުތަކަށް ގާނޫނުން ލާޒިމުކުރާ ކަމެއް ކަމަށެވެ.
