މަގު ކޮނުމުގެ މަސައްކަތްތައް ކުރާއިރު މިހާރަށްވުރެ ބޮޑަށް ޒިންމާދާރުވެ، ވަޅުލާފައިވާ ކަރަންޓު ވިއުގައަށް ގެއްލުން ނުވާނެ ގޮތަށް މަސައްކަތްތައް ރާވައިގެން ކުރިއަށް ގެންދިއުމަށް ސްޓެލްކޯއިން އިލްތިމާސްކޮށްފިއެވެ.
އަމިއްލަ ފަރާތްތަކުން އިމާރާތް ކުރުމުގެ މަސައްކަތަށް މަގު ކޮންނަނިކޮށް ހައި-ވޯލްޓޭޖް ކޭބަލްތަކަށް ގެއްލުންވެ، ހުޅުމާލެ ފޭސް 1 ގެ ބައެއް ސަރަހައްދުތަކުން ކަރަންޓު ކެނޑޭ މައްސަލަ އަންނަނީ އިތުރުވަމުންނެވެ. އެގޮތުން ރޭވެސް ކަރަންޓު ކެނޑެން މެދުވެރިވީ ކުރެދިމާ ހިނގުމުގައި އަމިއްލަ ފަރާތަކުން އިމާރާތެއް ކުރުމަށް މަގު ކޮނުމުގެ ތެރޭގައި ވަޅުލާފައިވާ ހައި ވޯލްޓޭޖް ކޭބަލަކަށް ގެއްލުންވެގެންނެވެ. އަދި މިދިޔަ ބުރާސްފަތި ދުވަހު ހުޅުމާލެއިން ދެ ގަޑިއެއްހާ އިރަށް ކަރަންޓު ކެނޑުނީ ބަނަފްސާ ހިނގުން ސަރަހައްދުގައި މަގު ކޮންނަނިކޮށް ކޭބަލަށް ލިބުނު ގެއްލުމަކާ ގުޅިގެންނެވެ.
މިކަމާއި ގުޅިގެން ސްޓެލްކޯ އިން ބުނީ ކަރަންޓު ކޭބަލްތައް ވަޅުލާފައި ހުންނަނީ ބައިނަލްއަގުވާމީ މިންގަނޑުތަކާ އެއްގޮތަށް، ކޭބަލް އޮތް ސަރަހައްދު އަންގައިދޭ ޓޭޕާއި ރައްކާތެރިކަމުގެ ޝީޓުތަކާ އެކުގައި ކަމަށެވެ. ނަމަވެސް، މަގު ކޮންނަ މީހުން އެކަމަށް ނުބަލައި ކޭބަލަށް ގެއްލުންވުމުން، އެކަން ސިއްރުކުރުމުގެ ގޮތުން އަމިއްލައަށް ޓޭޕް އަޅާފައި ހުންނަކަންވެސް ފާހަގަކުރެވިފައިވާ ކަމަށް އެ ކުންފުނިން ބުންޏެވެ.
މިފަދަ ހާދިސާތައް ތަކުރާރުވުމަކީ އާންމު ރައްޔިތުންނަށް އިންތިހާއަށް ދަތިތަކާ ކުރިމަތިލާންޖެހޭ ކަމެއްކަން ފާހަގަކޮށް، މަގު ކޮނުމުގެ މަސައްކަތްތައް ކުރާއިރު މިހާރަށްވުރެ ބޮޑަށް ޒިންމާދާރުވެ، ވަޅުލާފައިވާ ކަރަންޓު ވިއުގައަށް ގެއްލުން ނުވާނެ ގޮތަށް މަސައްކަތްތައް ކުރިއަށް ގެންދިއުމަށް ސްޓެލްކޯއިން ވަނީ އިލްތިމާސްކޮށްފައެވެ.
