ރަސްމާލެ ފަދަ ބޮޑު ބިމެއް ބަޔަކަށް ދިނުމަށް އެއްބަސްވުން ހެދުމުގެ ކުރިން ރައްޔިތުންގެ ފެންނަ ނުފެންނަ ވޯޓެއް ނަގަންޖެހޭނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޕީޕަލްސް ނެޝަނަލް ފްރަންޓް (ޕީއެންއެފް) އިން ބޭއްވި ޖަލްސާއެއްގައި ވާހަކަދައްކަވަމުން ޔާމީން ވިދާޅުވީ، ރައްޔިތުންގެ ފެންނަ ނުފެންނަ ވޯޓެއް ނަގަންޖެހެނީ ހަމައެކަނި އިންތިހާބުތައް އެއްކޮށްލުމަށް ނޫން ކަމަށާއި، ގައުމުގެ ބޮޑެތި ނިންމުންތަކުގައި ވެސް ރައްޔިތުންގެ ހިޔާލު ހޯދަންޖެހޭނެ ކަމަށެވެ.
"ރައްޔިތުންގެ ފެންނަ ނުފެންނަ ވޯޓެއް ނަގަން ޖެހެނީ ހަމައެކަނި ދެ އިންތިހާބު އެއްކޮށްލައި، ރައީސް ޑރ. މުހައްމަދު މުއިއްޒަށް މުޅި އުމުރު ދުވަހު ވެރިކަމުގައި ހުރެވޭތޯ ބެލުމަށް ނޫން. ރަސްމާލެ ފަދަ ރައްޔިތުންނާ ގުޅުންހުރި ބޮޑު ބިމެއް ބަޔަކަށް ދިނުމަށް އެއްބަސްވުން ހެދުމުގެ ކުރިން ވެސް ރައްޔިތުންގެ ފެންނަ ނުފެންނަ ވޯޓެއް ނަގަން ޖެހޭނެ" ޔާމީން ވިދާޅުވިއެވެ.
އަބޫދާބީގެ އީގަލް ހިލްސް ކުންފުންޏާއެކު ވެވުނު އެއްބަސްވުމަށް ފާޑުވިދާޅުވަމުން ޔާމީން ވިދާޅުވީ، މިއީ ގާނޫނާ ހިލާފަށް ހިންގާފައިވާ މުއާމަލާތެއް ކަމަށާއި ކުރިއަށް އޮތް ސަރުކާރަކުން މި އެއްބަސްވުން ބަލައިގަންނަން ނުޖެހޭނެ ކަމަށެވެ. އަދި މި މަޝްރޫއަކީ ދިގު މުއްދަތަކަށް ދިވެހިންނަށް ފައިދާހުރި ކަމެއް ނޫން ކަމަށްވެސް އެމަނިކުފާނު ފާހަގަކުރެއްވިއެވެ. އަދި "ޔަހޫދީން" ވަޒަންވެރިކުރުވުމަށް ރަސްމާލެ ދޫކޮށްލުމަކީ ނުރައްކަލަކަށް ގައުމު ވައްޓާލުން ކަމަށާއި މި މުއާމަލާތް ހިންގުމުގައި ރައީސް މުއިއްޒާއި ހައުސިން މިނިސްޓަރު ޑރ. އަބްދުﷲ މުއްތޮލިބު އަދި ބަންޑާރަ ނައިބު އަހުމަދު އުޝާމް ބައިވެރިވެވަޑައިގެންފައި ވާތީ އެއީ ކުށްވެރިންގެ ގޮތުގައި ޔާމީން ވަނީ ސިފަކުރައްވާފައެވެ.
ރަސްމާލެ މަޝްރޫއުގެ ދަށުން 1,100 އަށްވުރެ ގިނަ ހެކްޓަރުގެ ބިން ހިއްކައި، 65,000 ހައުސިން ޔުނިޓް ގާއިމުކުރުމަށް ނިންމާފައިވާއިރު ޔާމީން ވިދާޅުވީ މިފަދަ ކަންކަމުގައި ރައީސުލްޖުމްހޫރިއްޔާއަށް ނޫނެކޭ ބުނުމަކީ ސަލާމަތީ ބާރުތަކަށް ގާނޫނުން ލާޒިމުކުރާ ކަމެއް ކަމަށެވެ.
