ޕާކިސްތާނުގެ ކުރީގެ ބޮޑުވަޒީރު އިމްރާން ހާންގެ އުހުތު އަލީމާ ހާނުމް ލާހޯރުން ހައްޔަރުކޮށްފިއެވެ.
އިމްރާން ހާން ނިސްބަތްވެވަޑައިގަންނަވާ ޕާކިސްތާން ތަހްރީކޭ އިންސާފް (ޕީޓީއައި) ޕާޓީން ބުނި ގޮތުގައި، އަލީމާ ހާނުމް ހައްޔަރުކޮށްފައި ވަނީ އާދީއްތަ ދުވަހުގެ މެންދުރުފަހުގެ ވަގުތެއްގައެވެ. ޕީޓީއައިގެ އޮފިޝަލުން ވަނީ މިއީ ގާނޫނާ ހިލާފަށް ކުރި ކަމެއް ކަމަށް ސިފަކޮށްފައެވެ.
ލާހޯރުގެ ޑެޕިއުޓީ ކޮމިޝަނަރު ނެރުނު ހައްޔަރުކުރުމުގެ އަމުރުގައި ބުނެފައިވަނީ، ސޯޝަލް މީޑިއާއާއި އާންމު ބައްދަލުވުންތައް މެދުވެރިކޮށް އިމްރާން ހާންގެ ސަޕޯޓަރުން އެއްކޮށް، ގައުމުގެ އަމަންއަމާންކަން ނަގާލުމަށް އޭނާ މަސައްކަތްކުރަމުންދާ ކަމަށެވެ. އަދި ސަރުކާރާ ދެކޮޅަށް އާންމުންގެ ތެރޭގައި ނޭދެވޭ ޝިއާރުތައް ފާޅުކުރަމުންދާ ކަމަށްވެސް އެ އަމުރުގައި ތުހުމަތުކޮށްފައިވެއެވެ. މި އަމުރުގެ ދަށުން އޭނާ 30 ދުވަހުގެ މުއްދަތަށް ބަންދުކުރާނެއެވެ.
ޕާކިސްތާނުގެ ފުލުހުންގެ އޮފިޝަލަކު ވަނީ އަލީމާ ހާނުމް ހައްޔަރުކުރިކަން ބީބީސީއަށް ކަށަވަރުކޮށްދީފައެވެ. އޭނާ ބަންދުކޮށްފައި ބަހައްޓާނީ ލާހޯރުގެ ކޮޓް ލަކްޕަތު ޖަލުގައެވެ. އަލީމާ ހާނުމަކީ އޭނާގެ ބޭބެ އިމްރާން ހާން ހައްޔަރުކުރުމާ ގުޅިގެން އެކަމަށް ވަރަށް ބޮޑަށް ފާޑުކިޔަމުންދާ، އަދި ސަޕޯޓަރުންނާއި މީޑިއާތަކާ ގަވާއިދުން ވާހަކަދައްކަމުންދާ މީހެކެވެ.
އޭނާ ހައްޔަރުކުރި ދުވަހުގެ ކުރީކޮޅު އާއިލާއިން ބުނެފައިވަނީ އޭނާ ވީތަނެއް ނޭނގޭ ކަމަށާއި އެއްވެސް ގުޅުމެއް ނެތް ކަމަށެވެ. އަލީމާ ހާނުމްގެ ދަރިފުޅު ޝަހްރޭޒް ހާން 'އެކްސް' ގައި ކުރި ޕޯސްޓެއްގައި ބުނެފައިވަނީ، އޭނާގެ މަންމަ ހުރި ތަނެއް ސަރުކާރުން ވަގުތުން ހާމަކުރުމަށާއި ރައްކާތެރިކަމާއެކު އަނބުރާ ފޮނުވައިދިނުމަށް ގޮވާލާ ކަމަށެވެ.
އަލީމާ ހާނުމް ހައްޔަރުކޮށްފައި މިވަނީ، ސެޕްޓެންބަރު 27 ވަނަ ދުވަހު ޕާކިސްތާނުގެ ވެރިރަށް އިސްލާމްއާބާދަށް މިސްރާބުކޮށް ބޮޑު މުޒާހަރާއެއް ބޭއްވުމަށް ރާވާފައި ވަނިކޮށެވެ. މި މުޒާހަރާއާ ގުޅިގެން އިސްލާމްއާބާދުގެ މަގުތަކުގައި ސަރުކާރުގެ އިމާރާތްތައް ހިމާޔަތްކުރުމަށްޓަކައި ޝިޕިންގ ކޮންޓެއިނަރުތައް ވަނީ އަތުރާފައެވެ. ޕާކިސްތާނުގެ އިންޓީރިއާ މިނިސްޓަރާ ހަވާލާދީ މީޑިއާތަކުން ރިޕޯޓުކޮށްފައިވާ ގޮތުގައި، މި މުޒާހަރާތަކުގެ ސަބަބުން ގައުމަށް ގެއްލުންވާނެ ކަމަށާއި، މުޒާހަރާތައް ހުއްޓުވުމަށް ސަރުކާރުން ކުރެވެން ހުރި ހުރިހާ މަސައްކަތެއް ކުރާނެއެވެ.
އިމްރާން ހާން ހައްޔަރުކޮށްފައިވަނީ 2023 ވަނަ އަހަރުގައެވެ. އޭނާގެ މައްޗަށް ވަނީ ދައުލަތުގެ ސިއްރުތައް ލީކުކުރުމާއި ދައުލަތުގެ ހަދިޔާ ވިއްކުމާ ގުޅޭ 100 އަށް ވުރެ ގިނަ މައްސަލައިގައި ދައުވާކޮށްފައެވެ. ނަމަވެސް އިމްރާން ހާން ވިދާޅުވާ ގޮތުގައި މިއީ ސިޔާސީ މަގުސަދެއްގައި އުފުލާފައިވާ ދައުވާތަކެކެވެ. މިދިޔަ އަހަރު ބިމުގެ ކޮރަޕްޝަންގެ މައްސަލައެއްގައި އޭނާގެ މައްޗަށް 14 އަހަރުގެ ޖަލު ހުކުމެއް އިއްވާފައިވާއިރު، ޖަލުގައި ހުންނަވަނިކޮށް އޭނާގެ ސިއްހީ ހާލަތު ދަށްވަމުންދާ ކަމަށް ރިޕޯޓުތައް ބުނެއެވެ. މިގޮތުން މިދިޔަ މަހު އޭނާ ވަނީ ޑޮކްޓަރަށް ދެއްކުމަށް ހޮސްޕިޓަލަށް ގެންގޮސްފައެވެ.
