ޕްރޮސިކިއުޓަރ ޖެނެރަލްގެ އޮފީހުގެ މަސައްކަތްތައް ޒަމާނީ ޓެކްނޮލަޖީއާއެކު މުޅިން ޑިޖިޓަލްކުރުމަށް ހިންގާ "ޕީޖީއޯ 2.0" މަޝްރޫއު ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ރަސްމީކޮށް އިފްތިތާހް ކޮށްދެއްވައިފިއެވެ.
މިއަދު، 11 އޮގަސްޓު 2026 ވީ އާދީއްތަ ދުވަހު ބާސެލޯގައި ބޭއްވުނު ހާއްސަ ރަސްމިއްޔާތެއްގައި މި މަޝްރޫއު އިފްތިތާހް ކޮށްދެއްވުމަށް ފަހު، ޕްރޮސިކިއުޝަންގެ މަސައްކަތްތަކަށް ހާއްސަކޮށްފައިވާ "ސޮވްރިން އޭއައި" ވެސް ވަނީ ތައާރަފް ކޮށްފައެވެ. މިއާއެކު، އެ އޮފީހުގެ ކޭސް މެނޭޖްމަންޓް ސިސްޓަމްގެ ތެރެއަށް އާޓިފިޝަލް އިންޓެލިޖެންސް (އޭއައި) އިންޓަގްރޭޓް ކުރެވި، މަސައްކަތްތައް އިތުރަށް ހަލުވިވެގެންދާނެއެވެ.
ޕީޖީ އޮފީހުން ބުނީ "ޕީޖީއޯ 2.0" އަކީ ޒަމާނުއްސުރެ ކަރުދާހުގައި ކުރަމުން އައި މަސައްކަތްތައް މުޅިން ޑިޖިޓަލް ނިޒާމަކަށް ބަދަލުކޮށް، ދެފުއްފެންނަ ހަރުދަނާ ހިދުމަތްތަކެއް ރައްޔިތުންނަށް ފޯރުކޮށްދިނުމަށް ފެށި މަޝްރޫއެއްކަމަށެވެ. އޭއައިގެ އެހީގައި މައްސަލަތައް ދިރާސާކުރުމާއި، ހެކި ވަޒަންކުރުމުގެ އިތުރުން ގާނޫނީ ލިޔެކިޔުންތައް ތައްޔާރުކުރުމަށް ޕްރޮސިކިއުޓަރުން ހޭދަކުރާ ވަގުތު މި ނިޒާމުގެ ސަބަބުން ވަރަށް ބޮޑަށް ސަލާމަތް ކުރެވޭނެއެވެ. ނަމަވެސް، އޭއައި ބޭނުންކުރި ކަމުގައިވިޔަސް، މައްސަލަތަކުގައި އެންމެ ފަހުގެ ނިންމުންތައް ނިންމާނީ އިންސާނުން ކަމަށް އެ އޮފީހުން ފާހަގަކުރެއެވެ.
މި ހަފްލާގައި ދައުލަތުގެ އިސް ބޭފުޅުން ބައިވެރިވެވަޑައިގެން، ޕީޖީ އޮފީހުގެ އާ ހިދުމަތްތައް ވަނީ އިފްތިތާހްކޮށްދެއްވާފައެވެ. އެގޮތުން:
- އާ ވެބްސައިޓާއި އީ-ދޮރޯށި: އިގްތިސާދީ ތަރައްގީއާއި ވިޔަފާރިއާއި ދަތުރުފަތުރާ ބެހޭ މިނިސްޓަރު މުހައްމަދު ސައީދު ވަނީ އެ އޮފީހުގެ އާ ވެބްސައިޓް އިފްތިތާހް ކޮށްދެއްވާފައެވެ. މީގެ އިތުރުން، ރައްޔިތުންނާއި އިދާރާތަކަށް ޑިޖިޓަލްކޮށް ހިދުމަތް ދިނުމަށް ތައާރަފްކުރި "އީ-ދޮރޯށި" ވެސް ވަނީ ލޯންޗްކޮށްފައެވެ.
- އެވިޑެންސް ގައިޑް: ހެއްކާ ބެހޭ ގާނޫނުގެ މައްޗަށް އެކުލަވައިލާފައިވާ "އެވިޑެންސް: އަ ޕްރެކްޓިޝަނާ ގައިޑް" ފޮތް އިފްތިތާހްކޮށްދެއްވީ އުއްތަމަ ފަނޑިޔާރު އަލްއުސްތާޛު އަބްދުލްގަނީ މުހައްމަދެވެ.
- ވާޗުއަލް ދޮރޯށި: އޮފީހުގެ ކައުންޓަރަށް ނުގޮސް އޮންލައިންކޮށް ހިދުމަތް ހޯދޭނެ "ވާޗުއަލް ދޮރޯށި" އިފްތިތާހްކޮށްދެއްވީ ފޮރިން މިނިސްޓަރު އިރުތިޝާމް އާދަމެވެ.
- ލެތުން އެޕްލިކޭޝަން: ޖިނާއީ އަދުލުގެ ނިޒާމުގެ ހުރިހާ ގާނޫނުތަކާއި ކޯޓު ނިންމުންތައް އެއްތަނަކުން ބަލައިލެވޭ "ލެތުން" މޯބައިލް އެޕްލިކޭޝަން އިފްތިތާހްކޮށްދެއްވީ ބަންޑާރަ ނައިބު އަހްމަދު އުޝާމެވެ.
ޕްރޮސިކިއުޓަރ ޖެނެރަލްގެ އޮފީހުން ހާމަކޮށްފައިވާގޮތުން، "ޕީޖީއޯ 2.0" މަޝްރޫއަކީ ރާއްޖޭގެ ޕްރޮސިކިއުޝަންގެ ހިދުމަތްތައް ބައިނަލްއަގްވާމީ ފެންވަރަށް ތަރައްގީކޮށް، ޓެކްނޮލަޖީގެ އެހީގައި އަދުލު އިންސާފު ގާއިމުކުރުމަށް އެޅުނު މުހިންމު ފިޔަވަޅެއް ކަމަށެވެ.
