އަނބިމީހާގެ ކޮއްކޮއަށް ޖިންސީ ގޯނާކުރި މައްސަލައެއްގައި ކުށް ސާބިތުވި މީހަކު 18 އަހަރަށް ޖަލަށްލުމަށް ދަށު ކޯޓުން އިއްވި ހުކުމަށް ބަދަލު ގެންނަންޖެހޭ އެއްވެސް ސަބަބެއް ނެތް ކަމަށް ހައި ކޯޓުން މިއަދު ކަނޑައަޅައިފިއެވެ.
މި މައްސަލައިގައި ދައުލަތުން ދައުވާކޮށްފައިވަނީ، އިސްތިއުނާފު ކުރި މީހާ އޭނާގެ އަނބިމީހާގެ އަށް އަހަރުގެ ކޮއްކޮއަށް އެކި ދުވަސްމަތިން ބަދުއަހުލާގީ ފޮޓޯ އާއި ވީޑިއޯ ދައްކައި، ޖިންސީ ނިޔަތެއްގައި ކުއްޖާގެ ހަށިގަނޑުގައި އަތްލައި ގޯނާކޮށްފައިވާ ކަމަށް ބުނެއެވެ.
މި މައްސަލަ ހައި ކޯޓުގައި އިސްތިއުނާފު ކުރަމުން، އެ މީހާގެ ފަރާތުން ބުނެފައިވަނީ މިއީ އޭނާގެ އަނބިމީހާއާ ދެމެދު އޮތް ޒާތީ ހަސަދަވެރިކަމެއްގެ ސަބަބުން، ކުއްޖާ ލައްވާ ދައްކުވާފައިވާ ހަގީގަތާ ހިލާފު ވާހަކަތަކެއް ކަމަށެވެ. އަދި އެ ކުއްޖާއަކީ ވާހަކަ ލިޔަން ފަރިތަ ކުއްޖަކަށް ވުމުން، މިއީ ކުއްޖާ އަމިއްލައަށް އުފައްދާފައިވާ "ފެންޓަސީ" ވާހަކަތަކެއް ކަމަށް ވެސް އޭނާ ވަނީ ފާހަގަކޮށްފައެވެ. ނަމަވެސް، ހައި ކޯޓުން ކުރި ހުކުމުގައި ބުނެފައިވަނީ، އެއީ ކުއްޖާ ހަދައިގެން ދެއްކި ވާހަކައެއްކަން ނުވަތަ އަނބިމީހާގެ ނުފޫޒުން ދެއްކި ވާހަކައެއްކަން ސާބިތުކޮށްދޭން އޭނާގެ ފަރާތުން އެއްވެސް ހެއްކެއް ހުށަހަޅާފައި ނުވާ ކަމަށެވެ.
ދަށު ކޯޓުގެ ނިންމުމަށް ތާއީދުކުރަމުން ހައި ކޯޓުން ބުނީ، ކުޑަކުއްޖާގެ ފަރާތުން ދީފައިވާ ބަޔާންތަކަކީ ބުއްދި ގަބޫލުކުރެވޭ ހަގީގީ ވާހަކަތަކެއް ކަމަށް ބެލެވޭ ކަމަށެވެ. އަދި އެ ވާހަކަތަކަކީ ހަމައެކަނި ޚިޔާލީ ވާހަކަތަކެއްގެ ގޮތުގައި ބެލެވެން ނެތް ކަމަށް ވެސް ފަނޑިޔާރުންގެ އިއްތިފާގުން ވަނީ ނިންމަވައިފައެވެ.
މީގެ އިތުރުން، ކުއްޖާގެ ހެކިބަސް ނެގި ގޮތާ މެދު އޭނާގެ ފަރާތުން އުފެއްދި ގާނޫނީ ސުވާލުތަކަށް ވެސް ހައި ކޯޓުން ވަނީ ރައްދު ދީފައެވެ. ހުކުމުގައި ފާހަގަކޮށްފައިވަނީ، ދަށު ކޯޓުގައި ހެކިބަސް ނެގި މަރުހަލާގައި އެކަމަށް އެއްވެސް އިއުތިރާޒެއް ކޮށްފައި ނުވާތީ، މަތީ މަރުހަލާގެ ކޯޓެއްގައި އެ ނުކުތާ އާލާ ނުކުރެވޭނެ ކަމަށެވެ.
މި ނިންމުމާއެކު، ޖިންސީ ގޯނާގެ މި ބޮޑު ކުށުގައި އޭނާއަށް އިއްވާފައިވާ 18 އަހަރުގެ ޖަލު ހުކުމް މިހާރު ވަނީ ނިހާއީ ހުކުމަކަށް ވެފައެވެ.
