ކާރަކާއި ސައިކަލެއް ޖެހި ލ. ގަމުގައި ނުރައްކާތެރި އެކްސިޑެންޓެއް ހިނގައިފިއެވެ.
ފުލުހުން ބުނީ، ލ. ގަމު ތުނޑި މާފަތް މަގާއި އިޖުތިމާއީ ގުޅުން ހަތަރު އަނގޮޅީގައި ކާރަކާއި ސައިކަލެއް ޖެހި އެކްސިޑެންޓެއް ހިނގާފައިވާ ކަމަށެވެ.
އަދި މި މައްސަލަ ފުލުހުންނަށް ރިޕޯޓުކޮށްފައި ވަނީ ރޭގެ 21:39 ހާއިރުކަން ފާހަގަކޮށް ފުލުހުން އިތުރަށް ބުނީ، އެ އެކްސިޑެންޓްގައި ހިމެނޭ ސައިކަލުގައި ތިބި ދެ މީހުންނަށް އަނިޔާވެގެން ހޮސްޕިޓަލުގައި ފަރުވާ ދެމުން އަންނަ ކަމަށެވެ.
ނަމަވެސް އެކްސިޑެންޓުގައި އަނިޔާވި މީހުންނަށް ލިބުނީ ކޮންކަހަލަ އަނިޔާތަކެއް ކަމެއް ފުލުހުން ހާމަކޮށްފައި ނުވި ނަމަވެސް މައްސަލަ ބަލަމުންދާ ކަމަށް ފުލުހުން ބުނެއެވެ.
މީގެ ކުރިންވެސް ލ.ގަމުގައި ނުރައްކާތެރި އެކްސިޑެންޓުތައް ހިނގާފައިވާއިރު މިދިޔ އަހަރު އޮގަސްޓު މަހު ހިނގި އެކްސިޑެންޓެއްގައި އަނިޔާވި އުމުރުން 64 އަހަރުގެ އަންހެން މީހަކު ވަނީ ނިޔާވެސް ވެފައެވެ.
ލ. ކައްދޫ އެއާޕޯޓަށް ދާން އޮންނަ މަގުން ހުރަސްކުރި ދެ މީހެއްގެ ގައިގައި ޖެހިގެން ހިނގި އެ އެކްސިޑެންޓުވެސް ފުލުހުން ވަނީ ތަހުގީގު ފަށާފައެވެ.
