އައްޑޫ ސިޓީގެ ކަރަންޓު މައްސަލައަށް ދާއިމީ ހައްލެއް ގެނައުމުގެ މަޝްރޫއުއެއްގައި ސޮއިކޮށްފައިވާ ކަމަށް ރައީސުލްޖުމްހޫރިއްޔާ ޑރ. މުއިއްޒު ރޭ އިއުލާން ކުރައްވައިފިއެވެ.
ރައީސް މިކަން އިއުލާން ކުރެއްވީ ރޭ އާޓިފިޝަލް ބީޗުގައި އޮތް ޕީއެންސީގެ ދަ ގްރޭޓާ އައްޑޫ ކެމްޕެއިން ޖަލްސާގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، އައްޑޫ ސިޓީ އެންމެ ބޮޑަށް ދަތިވެފައިވާ ކަރަންޓުގެ މައްސަލައަކީ މިދައުރުގައި ޖެހެން ފެށީ މައްސަލައެއް ނޫން ކަމަށެވެ. މިއީ އެތައް ދައުރެއް ނިމިގެން ދިޔައިރު ވެސް ހައްލު ނުވި ކަމެއް ކަމަށާއި، އަބަދުވެސް ހައްލު ކުރާ ވާހަކަ ދެއްކި ނަމަވެސް ހައްލެއް ނުލިބުނު މައްސަލައެއް ކަމަށެވެ. އަދި މިއީ މިދިޔަ ސަރުކާރުގައި ވެސް އޮތް މައްސަލައެއް ކަަމަށާއި، މަޖިލިސް އަދި ކައުންސިލްގެ ސުޕަމެޖޯރިޓީ އޮތް އިރުވެސް ހައްލު ނުވި ކަމެއް ކަން ރައީސް ފާހަގަކުރެއްވިއެވެ.
މިމޭރުމުން އިތުރަށް ވާހަކަފުޅު ދައްކަވަމުން ރައީސް ވިދާޅުވީ، އައްޑޫ ސިޓީގެ ކަރަންޓު މައްސަލައަށް ދާއިމީ ހައްލެއް ގެނައުމަށް، އެކަމަށް ބޭނުންވާ އެއްބަސްވުމެއްގައި މިއަދު ހަވީރު ސޮއިކޮށްފައިވާ ކަމަށެވެ. މި އެއްބަސްވުމުގެ ދަށުން 26 މެގަވޮޓުގެ ކަރަންޓު ފޯރުކޮށްދެވޭނެ ނިޒާމެއް ގާއިމުކުރެވޭނެ ކަމަށް ރައީސް ވިދާޅުވިއެވެ. އަދި މިމަޝްރޫއު އަންނަ އަހަރުގެ ޖުލައި މަހު ނިންމާލެވޭނެ ކަމުގެ އުފާވެރި ހަބަރު ރައީސް ވަނީ ދެއްވާފައެވެ.
ރައީސް ވިދާޅުވީ ކަރަންޓުގެ މަސައްކަތް ހައްލުކުރުމަށް ސޮއިކުރި މަޝްރޫއުގެ ދަށުން ކުރެވޭ މަސައްކަތުގެ ފޮނި ނަތީޖާއިން ކުރިއަށް އޮތް 20 އަހަރު ދުވަހަށް އައްޑޫ ސިޓީގެ ކަރަންޓުގެ މައްސަލަ ހައްލުވެގެންދާނެ ކަމަށެވެ.
