ވ. ފުލިދޫ ކައުންސިލުން އެ ރަށުގެ ކުނި މެނޭޖް ކުރުމައްޓަކައި ތާމަލް ޑީކޮމްޕޮޒިޝަން މެޝިނެއް ގަނެ، އިންސްޓޯލް ކުރުމަށް ހަވާލު ކުރި ފަރާތުން އެއްބަސްވުމާ ހިލާފުވުމުން އެއްވެސް ފިޔަވަޅެއް އަޅާފައި ނުވުމުން މާލީ ގޮތުން ކައުންސިލަށް ބޮޑު ގެއްލުމެއް ލިބިފައިވާ ކަމަށް އޮޑިޓާ ޖެނެރަލް އޮފީހުން ބުނެފިއެވެ.
ފަތުރުވެރިކަމުގެ ގޮތުން ކުރިއަރަމުން އަންނަ ފުލިދޫގެ ކުނި މެނޭޖް ކުރުމުގެ ކަންކަން ހައްލުކުރުމަށް ތާމަލް ޑީކޮމްޕޮޒިޝަން މެޝިނެއް ހޯދުމަށް އިއުލާންކޮށްފައި ވަނީ ފެބްރުއަރީ 15، 2023 ގައެވެ. ތިން ފަހަރަށް އިއުލާން ކުރުމުން ވެސް އިތުރު ފަރާތަކުން ބިޑް ހުށަހަޅާފައި ނުވާތީ ބިޑް ހުށަހެޅި އަމިއްލަ ކުންފުންޏަކަށް މަސައްކަތް ވަނީ ހަވާލުކޮށްފައެވެ.
އޮޑިޓާ ޖެނެރަލް އޮފީހުން އާންމުކުރި އޮޑިޓް ރިޕޯޓުގައި ބުނާ ގޮތުގައި ބިޑް ހުށަހެޅި އަމިއްލަ ކުންފުނިން ހުށަހަޅާފައިވާ އަގު، 1،078،580 ރުފިޔާއަކީ އެކަށީގެންވާ އަގެއް ކަމަށާއި އެއީ ތަޖުރިބާ ހުރި ކުންފުންޏެއް ކަމުން އެ މަސައްކަތް ހަވާލުކުރަން އޭޕްރިލް 11، 2023 ގައި ފުލިދޫ ކައުންސިލް އިދާރާގެ ބިޑު ކޮމިޓީން ނިންމާފައިވާ ކަމަށެވެ. އެގޮތުން މަސައްކަތް ހަވާލުކޮށް އެއްބަސްވުމުގައި ސޮއި ކޮށްފައި ވަނީ އެ އަހަރުގެ މެއި މަހުގެ 2 ވަނަ ދުވަހުއެވެ.
އެއްބަސްވުމުގައިވާ ގޮތުން 90 ދުވަސްތެރޭ ތާމަލް ޑީކޮމްޕޮޒިޝަން މެޝިން ފޯރުކޮށްދީ ކުނިކޮށީގައި އިންސްޓޯލްކުރަން ޖެހެއެވެ. ހަމައެއާއެކު 7 ދުވަސްތެރޭ އެ މެޝިން ޓެސްޓުކޮށް، 14 ދުވަސްތެރޭ އެ މެޝިން ބޭނުންކުރާނެ ގޮތުގެ ތަމްރީން ކައުންސިލްގެ މުވައްޒަފުންނަށް ދިނުމަށް އެ އެއްބަސްވުމުގައި ބުނެފައި ވެއެވެ.
އޮޑިޓް ރިޕޯޓްގައި ބުނާ ގޮތުގައި އެ މެޝިން ހޯދުމަށް 4 ބަޔަކަށް ބަހާލައިގެން ދައްކަން ބުނެފައިވާ އިރު، އެއްބަސްވުމުގައި ސޮއިކުރާތާ 28 ދުވަސް ތެރޭގައި ޖުމްލަ އަގުގެ 15 ޕަސެންޓަށް ވާ 161،787 ރުފިޔާ ދައްކަން ބުނެފައި ވެއެވެ. ނަމަވެސް އެޑްވާންސަށް ކައުންސިލުން ދައްކާފައި ވަނީ 50 ޕަސެންޓަށް ވާ 539،290 ރުފިޔާއެވެ.
މި ފައިސާގައި ހިމެނެނީ އެޑްވާންސްގެ ގޮތުގައި ދޭން ބުނެފައިވާ 161،787 ރުފިޔާ އާއި އެ މެޝިން ގެނައުމަށް ބޯޓަށް އަރުވާ ހިސާބުން ދޭން ކަނޑައަޅާފައިވާ 377،503 ރުފިޔާ ހިމަނައިގެން ކަމަށް އޮޑިޓް ރިޕޯޓްގައި ބުނެއެވެ. އެއްފަހަރާ މި ދެ ބަޔަށްވާ ފައިސާ ހަވާލުކޮށްފައި ވަނީ ފިނޭންސް މިނިސްޓްރީގެ ހުއްދަ ނުނަގާ ކަމަށް ވެސް އެ ރިޕޯޓްގައި ބުނެފައި ވެއެވެ.
މީގެ އިތުރުން އެއްބަސްވުން އެކުލަވާލާފައި ވަނީ މެޝިން ބޭނުންކުރެވޭ ހާލަތަށް ނުގެނެވުނަސް އެއްބަސްވުމުގެ ޖުމްލަ އަގުގެ 90 ޕަސެންޓް ދައްކަން ޖެހޭ ގޮތަށް ކަމަށް އޮޑިޓްގައި ފާހަގަކޮށްފައި ވެއެވެ. މަސައްކަތާ ހަވާލުވި ފަރާތުން މެޝިން ފޯރުކޮށް ދީފައި ވީ ނަމަވެސް މެޝިން ހިންގައި ބޭނުން ކުރެވޭ ހާލަތަށް ގެނެސްފައެއް ނުވެއެވެ. އަދި މެޝިން ޓެސްޓު ކުރި އިރު އެ މެޝިނުން ކުނި އަންދަން ޖެހޭ މިންވަރަށް ކުނި އަންދާފައި ނުވާކަން ކައުންސިލްގެ ލިޔެކިޔުމުން އެނގެން އޮތް ކަމަށް ވެސް އެ ރިޕޯޓުގައި ބުނެފައި ވެއެވެ.
މި މަސައްކަތުގެ 90 ޕަސެންޓަށް ވާ ފައިސާ 970،721 މެޝިން ފޯރުކޮށްދިން ފަރާތަށް ދައްކާފައިވީ ނަމަވެސް ކުނި މެނޭޖްކުރުމަށް ލިބެންޖެހޭ ލުއި ފަސޭހަ ލިބިފައި ނުވާ ކަމަށާއި އަދި މާލީ ގޮތުން ކައުންސިލަށް ބޮޑު ގެއްލުމަކާ ކުރިމަތިލާން ޖެހުނު ކަމަށް ވެސް އޮޑިޓް އޮފީހުން ބުނެއެވެ.
މެޝީން ހޯދުމަށް ދެފަރާތުގެ ދެމެދުގައި ވެފައިވާ އެއްބަސްވުމާ އެއްގޮތަށް މެޝިން ބޭނުންކުރެވޭ ހާލަތަށް ނުގެންގޮސް އަދި މުވައްޒަފުން ތަމްރީން ކޮށްފައި ނުވާތީ، އެއްބަސްވުމާ ހިލާފްވެފައިވާ ކަމަށް އޮޑިޓް ރިޕޯޓުން ފާހަގަކުރެއެވެ. ނަމަވެސް މި ހާލަތުގައި އެ ފަރާތަށް ދޭން ޖެހޭ އަގުގެ 10 ޕަސެންޓް ނުދައްކާ އޮތް ނަމަވެސް އެއްބަސްވުމާ ހިލާފްވުމުން އަޅަން ޖެހޭ އެއްވެސް ފިޔަވަޅެއް އަޅާފައި ނުވާ ކަމަށް އޮޑިޓް ރިޕޯޓްގައި ބުނެއެވެ. މިފަދައިން ފިޔަވަޅު ނޭޅުމަކީ މިފަދަ ފަރާތްތަކުން ބީލަންތަކުގައި ބައިވެރިވެ، ދައުލަތަށް މާލީ ގޮތުން ގެއްލުންވާނެ ފަދަ ކަމެއް ތަކުރާރުވާނެ ކަމުގެ ފުރުސަތު އުފެދޭނެ ކަމެއް ގޮތުގައި އޮޑިޓުން ބުނެއެވެ.
