ތުއްތު ކުއްޖަކަށް ޓެކްސީއެއްގެ ތެރެއަށް ހޮޑު ލެވުމުން، ޓެކްސީ ދުއްވަން އިން ޑްރައިވަރު އެ ސާފުކުރުމަށް 1،500 ރުފިޔާ ނަގަން ޑިމާންޑް ކުރި ކަމަށް ބުނާ ވާހަކަތައް އެ ޓެކްސީ ނިސްބަތްވާ "ނަލަ ޓެކްސީ" ސެންޓަރުން ދޮގުކޮށްފިއެވެ.
ސޯޝަލް މީޑިއާގައި އަންހެނަކު ހިއްސާކޮށްފައިވާ ގޮތުން މި ހާދިސާ ދިމާވީ މިދިޔަ ހަފްތާ ބަންދަށް މާލެ އައުމަށްފަހު އެނބުރި ރަށަށްދާން ފެރީއަށް ދިއުމަށް ކުރި ދަތުރުގައެވެ. އެ މީހާ ބުނި ގޮތުގައި ހުޅުމާލެއިން މާލެ ހަތް ނަންބަރު ޖެޓީއަށް ކުރި އެ ދަތުރުގައި ތުއްތު ކުއްޖާއަށް ހޮޑުލެވުނީ ސިނަމާލެ ބްރިޖުން މާލެއަށް އަރަނިކޮށެވެ.
އަދި ދަރިފުޅަށް ހޮޑުލެވުމުން އެ ވާހަކަ ޓެކްސީ ޑްރައިވަރުގެ ގާތުގައި ބުނުމާ އެކު، 1،500ރ. ދޭން ޖެހޭނެ ކަމަށް ވަގުތުން ބުނި ކަމަށް ވެއެވެ.އަދި ޓެކްސީ ދޮންނަން 1،500ރ. އަރާނެ ކަމަށް ބުނި ނަމަވެސް ކުއްޖާއަށް ލެވުނު ހޮޑު ހުރީ އެ ކުއްޖާގެ ގައިގަ އާއި އޭނާގެ ގައިގައި ކަމަށާއި ސީޓުގައި ހޭކިފައި ހުރީ ކުޑަ ހޮޑު ކޮޅެއް ކަމަށް އެ ކުއްޖާގެ މަންމަ ސޯޝަލް މީޑިއާގައި ހިއްސާކޮށްފައި ވެއެވެ.
ހަމަ އެހެންމެ ހޮޑުލަވާ ނަމަ ބޭނުންކުރާނެ ކޮތަޅު ޓެކްސީގައި ހުންނާނެ ކަމަށް ޑްރައިވަރު ބުނި ކަމަށާއި ނަމަވެސް އެ ކުއްޖާއަކީ ވާހަކަ ދެއްކޭ ވަރަށް ވުރެ ކުޑަ ކުއްޖެއް ކަމަށް ބުނެ މަންމަ ވަނީ ކަންބޮޑުވުން ފާޅުކޮށްފައެވެ. ކުއްޖާއަށް ހޮޑުލެވުމުން ފައިސާއަށް ޑިމާންޑްކުރަމުން ޓެކްސީ ދުއްވީ މަޑުން ކަމަށްވެސް މަންމަ ތުހުމަތުކޮށްފައި ވެއެވެ.
އެ ތުހުމަތުތަށް ދޮގުކޮށް ނަލަ ޓެކްސީ ސެންޓަރުން މިއަދު ނެރުނު ނޫސްބަޔާނެއްގައި ބުނީ، ކާރެއްގެ ތެރެއަށް ތުއްތު ކުއްޖަކު ހޮނޑުލެވުމާއި ގުޅިގެން ޑްރައިވަރު 1500 ރުފިޔާއަށް ޑިމާންޑްކުރި ކަމަށް ބުނެ ސޯޝަލް މީޑިއާގައި ދައުރުވަމުންދާ ވާހަކަތަކަކީ ކަން ހިނގާފައިވާ ގޮތާ ހިލާފަށް ކަމުގެ ހަގީގަތް އޮޅޭ ގޮތަށް ދައުރުކުރަމުންދާ ވާހަކަތަކެއް ކަމަަށެވެ.
އެގޮތުން ކަން ހިނގާ ދިޔަ ގޮތް ތަފްސީލު ކޮށްދެމުން އެ ސެންޓަރުން ބުނީ، އެ ދަތުރަކީ ހުޅުމާލެ ފޭސް 2 އިން 7 ނަންބަރު ޖެޓީއަށް ނަލަ ޓެކްސީ އެޕްލިކޭޝަން މެދުވެރިކޮށް ނަގާފައިވާ ދަތުރެއް ކަމަށެވެ. އަދި އެ ދަތުރު މަތިން ބްރިޖް ލައިޓް ކައިރިން ތުއްތު ކުއްޖަކަށް ހޮނޑުލެވުނު ވާހަކަ ކަސްޓަމަރު ޑްރައިވަރު ގާތުގައި ބުނި ކަމަށް ވެއެވެ.
އަދި ކަސްޓަމަރު ކޮތަޅު ހުރިތޯ އެހުމުން ޝީޓް ކައިރީ ކޮތަޅު ހުންނާނެކަމަށާއި ކާރުގެ ޝީޓަށާއެކު ހޮނޑުލެވިފައިހުރުމުން އާންމުކޮށް ޝީޓް ސާފުކުރުމަށް 1500 ރުފިޔާވަރު ސާފުކޮށްދޭ ތަންތަނުން ނަގާކަމަށް ޑްރައިވަރު ބުނި ކަމަށް ވެއެވެ. އެހެން ޑްރައިވަރު ބުނުމުން ކަސްޓަމަރު ފޯނުން މީހަކާ ގުޅައި ޑްރައިވަރާ ވާހަކަ ދައްކައި، އޭނާ ބުނާ ތަނަކަށް ސާފުކުރުމަށް ދިއުމަށް ބުނުމުން، ކަސްޓަމަރު ދާން ބޭނުންވި ލޮކޭޝަނަށް ގަޑިއަށް ކަސްޓަމަރު ގެންގޮސްދިނުމަށްފަހު، ފޯނުން ވާހަކަ ދެއްކި ފަރާތް ބުނިތަނަށް ކާރުގެ ޝީޓް ސާފުކުރުމަށް ޑްރައިވަރު ގޮސްފައިވާ ކަމަށް ވެސް އެ ބަޔާނުގައި ބުނެފައި ވެއެވެ.
ހަމަ އެހެންމެ ކާރު ޝީޓް ސާފުކުރުމަށް އެތަނަށް ދިއުމުން ޝީޓް ސާފުކުރެވެން ނެތްކަމަށް އެވަގުތު ބުނުމުން ޑްރައިވަރު އެތަނާ ޖެހިގެން ހުރި ތަނަށް ގޮސް ކާރުގެ ޝީޓް ސާފުކޮށްދެވޭނެތޯ އާއި ސާފުކޮށްދޭ އަގު އަހާ ސާފުކުރި ކަމަށް ވެއެވެ. އެގޮތުން އެތަނުން 1600 ރުފިޔާއަށް ނަމަވެސް އެތަނުގެ ފަރާތްތަކާ ވާހަކަ ދައްކައިގެން އެ އަގު ކުޑަކުރުމަށް ވާހަކަދައްކައި އެ އަގު 1000 ރުފިޔާއަށް ކުޑަ ކުރި ކަމަށް ވެއެވެ.
އެ ކަންކަން ހިނގިއިރުވެސް ޑްރައިވަރު ދިޔައީ ދަތުރުގެ ތެރެއިން ކަސްޓަމަރު ގުޅި ފަރާތާ ފޯނުން ގުޅައިގެން ވާހަކަ ދައްކަމުންދިޔަ ކަމަށާއި އޭރު ޝީޓް ސާފުކުރުމަށް 1000 ރުފިޔާ ނަގާފައިވަނީ ފޯނުން ގުޅައިގެން ވާހަކަ ދައްކަމުންދިޔަ ފަރާތާއި ޑްރައިވަރާ ވާހަކަ ދެކެވި އެ އަގަށް އެއްބަސްވެގެންކަމަށް އެ ޓެކްސީ ސެންޓަރުން ވަނީ ބުނެފައެވެ.
ސާފުކުރުމުގެ މަސައްކަތް ކުރަމުންދިޔަ ފޮޓޯވެސް ފޯނުން ވާހަކަ ދައްކަމުންދިޔަ ފަރާތާ ހިއްސާކުރި ކަމަށާއި ޝީޓް ސާފުކުރުމަށް ފައިސާ ލިބުނު ނަމަވެސް، ސާފުކުރުމަށް ދިޔަ ހަރަދު ފިޔަވައި ކަސްޓަމަރު ކުރި ދަތުރުގެ އަގުވެސް ޑްރައިވަރަށް ލިބިފައިނުވާ ކަމަށް އެ ބަޔާނުގައި ބުނެފައި ވެއެވެ.
މިކަމުގައި ދެފަރާތުންވެސް ވާހަކަ ދައްކައިގެން ގޮތަކަށް އެއްބަސްވެ، ކަންކަން ކުރުމަށްފަހު ޑްރައިވަރާއި ސެންޓަރުގެ އަގު ވެއްޓޭގޮތަށް ސޯޝަލް މީޑިއާގައި ހަގީގަތް އޮޅޭގޮތަށް ވާހަކަތައް ފެތުރުމަކީ ކަންބޮޑު ވާކަމެއް ކަމަށް ވެސް ސެންޓަރުން ވަނީ ބުނެފައެވެ.
މާލެތެރޭގައި ދަތުރުކުރާ ޓެކްސީތަކުން މިފަދަ ކަންކަން ހިނގުމުން ފަސިންޖަރުންނަށް އެހީތެރިކަމެއް ނުދީ، ގިނައިން ފައިސާ ނަގާ ކަމަށް ބުނެ ބައެއް އާންމުން މީގެ ކުރިން ވެސް ކަންބޮޑުވުން ފާޅުކޮށްފައި ވެއެވެ.
