ރާއްޖެއިން ބޭރަށް ގަވާއިދާ ހިލާފަށް ގިނަ އަދަދެއްގެ ބޭރު ފައިސާ ގެންދަން އުޅެނިކޮށް ވެލާނާ އިންޓަނޭޝަނަލް އެއާޕޯޓުން ހައްޔަރުކުރި ބަންގްލަދޭޝްގެ 6 ބިދޭސީންގެ ބަންދަށް ކްރިމިނަލް ކޯޓުން 30 ދުވަސް ޖަހައިފިއެވެ.
މަނީ ލޯންޑްރިންގެ ތުހުމަތުގައި މި މަހުގެ 18 ވަނަ ދުވަހު ހައްޔަރުކުރި މި މީހުންގެ އަތުން ޖުމްލަ 18 ގައުމެއްގެ ފައިސާ ފެނިފައިވެއެވެ. އޭގެ ތެރޭގައި 174,161 ޔޫއެސް ޑޮލަރާއި، 56,760 ޔޫރޯގެ އިތުރުން 1,815 ސްޓާލިން ޕައުންޑް ހިމެނެއެވެ. ފުލުހުން މައުލޫމާތު ދޭ ގޮތުގައި އަތުލައިގަނެވުނު ފައިސާގެ ޖުމްލަ އަގު ގާތްގަނޑަކަށް 3.8 މިލިއަން ރުފިޔާއަށް އަރައެވެ. މި ފައިސާ ފޮރުވާފައި ހުރީ ސީރިއަލް ޕެކެޓުތަކެއްގެ ތެރޭގައެވެ.
މި މައްސަލައިގައި ހައްޔަރުކޮށްފައިވަނީ އެމްޑީ މޮހިއްދީން ޗޯދްރީ (28 އޭ)، ރަޖިބް (31 އޭ)، އަޖްގޮރް މިރިދާ (37 އޭ)، އެމްޑީ ޝަހިން މިއާހް (46 އޭ)، މުހައްމަދު މައިނުއްދީން ސަލާހު (35 އޭ)، މުހައްމަދު އަބްދުﷲ (38 އޭ) އެވެ.
މި މީހުންގެ ބަންދާ މެދު ގޮތަށް ނިންމުމަށް ނެރުނު ކޯޓު އަމުރުގައިވާ ގޮތުން، ހައްޔަރުކުރެވުނު އެމްޑީ މޮހިއްދީނަކީ މީގެ ކުރިންވެސް މިފަދަ ގޮތްގޮތަށް ރާއްޖެއިން ފައިސާ ބޭރުކުރަން މަސައްކަތްކޮށްފައިވާ މީހެކެވެ. އަދި ތުހުމަތުކުރެވޭ އެހެން ބައެއް މީހުން ކުށަށް އިންކާރުކުރި ނަމަވެސް، ސީސީޓީވީ ފުޓޭޖްގެ ސްނެޕްޝޮޓްތަކުން އެމީހުންގެ ބައިވެރިވުން އޮތްކަން ޔަގީންވާކަމަށް ކޯޓުން ވަނީ ފާހަގަކޮށްފައެވެ.
