ވާޖިބު އަދާކުރަމުން ދަނިކޮށް ނިޔާވާ ފުލުހުންގެ އާއިލާތަކަށް، ފުލުހުންގެ ހިދުމަތުގެ ދަށުން ބޭސްފަރުވާ ކޮށްދޭ ގޮތަށް ފުލުހުންގެ ވަޒީފާގެ ގަވާއިދު އިސްލާހުކޮށްފިއެވެ.
ފުލުހުންގެ ވަޒީފާގެ ގަވާއިދަށް ގެނެވުނު އިސްލާހުތަކުގެ ތެރޭގައި، ފުލުހުންގެ އާއިލާތަކަށް ބޭސްފަރުވާ ކޮށްދޭ އުސޫލުގެ ދަށުން، ވާޖިބު އަދާކުރަނިކޮށް ނިޔާވާ ފުލުހުންގެ އާއިލާތަކަށްވެސް އެ ހިދުމަތް ލިބިދޭނެކަން ވަނީ ހަމަޖައްސާފައެވެ.
މީގެއިތުރުން، އެފަދައިން ނިޔާވާ ފުލުހުންގެ ޖަނާޒާ ހާއްސަ ރަސްމިއްޔާތެއްގެ ގޮތުގައި ބޭއްވުމުގެ އިހްތިޔާރުވެސް ގަވާއިދުގެ ތެރެއިން ލިބިދެއެވެ. ނަމަވެސް، އެފަދަ ރަސްމިއްޔާތެއް ބޭއްވޭނީ ހާދިސާ ހިނގި ގޮތާއި، އެ މުވައްޒަފަކު އަދާކުރި ދައުރަށް ބަލައި އެގްޒެކެޓިވް މެނޭޖްމަންޓު ބޯޑަށް ހުށަހަޅައިގެން އެ ބޯޑުން ނިންމާ ގޮތެއްގެ މަތިންނެވެ.
މީގެއިތުރުން، ކޮމިޝަނާ އޮފް ޕޮލިސް އަހްމަދު މުހައްމަދު ވިދާޅުވެފައިވަނީ، ޝަރަފުވެރިކަމާއެކު ރިޓަޔާކުރާ ފުލުހުންނަށް ދެވޭ އިނާޔަތްތަކަށް ބަދަލުތަކެއް ގެނައުމަށް ނިންމާފައިވާ ކަމަށެވެ. އެގޮތުން، ރިޓަޔާކުރާ ފުލުހުންގެ އިނާޔަތްތައް ހިސާބުކުރުމުގައި އޮތް ލިމިޓު ބަދަލުކޮށް، އެ މީހަކު ހިދުމަތްކުރި މުއްދަތަށް ބަލައި އިނާޔަތްތައް ހަމަޖައްސައިދެވޭނެ ކަމަށެވެ. އަދި 25 އަހަރުގެ ހިދުމަތަށްފަހު ރިޓަޔާކުރާ ފުލުހުންނަށް، ހިދުމަތުގައި ދެމިތިބޭ ފުލުހުންނެކޭ އެއްފަދައިން ބޭސްފަރުވާގެ ކަންކަން ހަމަޖެހިގެންދާނެކަންވެސް ސީޕީ ވަނީ އިއުލާންކުރައްވާފައެވެ.
