މަގުމަތީގެ ޓްރެފިކް އާންމު އުސޫލުތަކާއި ގަވާއިދުތަކާ ތަކުރާރުކޮށް ހިލާފުވާ ފަރާތްތަކާމެދު ހާއްސަ ހަރުކަށި ފިޔަވަޅުތަކެއް އެޅުމަށް ދިވެހި ފުލުހުންގެ ހިދުމަތުން ނިންމައިފިއެވެ.
މި ނިންމުން ނިންމާފައިވަނީ ކޮމިޝަނާ އޮފް ޕޮލިސް، އަހުމަދު މުހައްމަދު މިއަދު ދެއްވި މެސެޖެއްގައެވެ.
މަގުމަތީގެ ޓްރެފިކް އާންމު އުސޫލުތަކަށާއި އަދަބުތަކަށް ބޯނުލަނބާ މަދު ބައެއްގެ ސަބަބުން ގިނަ ބައެއްގެ ހައްގުތައް ގެއްލި، ނުރައްކާތެރި ހާދިސާތައް ތަކުރާރުވަމުންދާކަން ފާހަގަކޮށް ޕޮލިސް ކޮމިޝަނާ ވަނީ މިފަދަ އަމަލުތައް ހިންގާ ފަރާތްތަކާމެދު ހަރުކަށި ފިޔަވަޅު އެޅުމަކީ މުހިންމު ކަމެއް ކަމަށް ވިދާޅުވެފައެވެ.
އަދި މިފަދަ ނިންމުމެއް ނިންމުމުގެ މައިގަނޑު މަގުސަދަކީ މަގުތަކަކީ އެންމެންނަށް ރައްކާތެރި އަދި އަމާން ތަނަކަށް ހެދުމާއި ނުރައްކާތެރި ހާދިސާތައް ހުއްޓުވުން ކަމަށް ޕޮލިސް ކޮމިޝަނާ ވިދާޅުވެފައި ވެއެވެ.
މި މަސައްކަތުގެ ދަށުން، ކަމާގުޅުންހުރި އެންމެހާ މުއައްސަސާތަކާ ގުޅިގެން އެންމެ މަތީ ދަރަޖައިގައި ފިޔަވަޅުތައް އެޅުމަށް ކޮމިޝަނާ އޮފް ޕޮލިސް ވަނީ ފުލުހުންގެ އެކި ބަހާތަކަށް އަންގަވާފައެވެ. މި ފިޔަވަޅުތައް މާލެ ސަރަހައްދުގެ އިތުރުން ރާއްޖޭގެ އަތޮޅުތެރޭގައިވެސް ތަންފީޒުކުރަމުން ގެންދާނެ ކަމަށް ފުލުހުން ހާމަކޮށްފައި ވެއެވެ.
މިފަދަ ނިންމުމެއް ނިންމާފައިވާއިރު ބާރު ސްޕީޑްގައި އާންމުންގެ މެދުގައި ބިރުވެރިކަން އުފެދޭ ގޮތަށް ސައިކަލް ދުއްވުމަކީ މާލެ ސަރަަހައްދުގައި މިހާރު ވަރަށް ބޮޑުވެފައިވާ މައްސަލައެކެވެ. އެގޮތުން ދާދި ފަހުން ވަނީ ސޯސަންމަގުގައި ބާރު ސްޕީޑްގައި ދުއްވި ސައިކަލަކުން ޖެހި ހިނގި އެކްސިޑެންޓެއްގައި ޒުވާން އަންހެނަކު ނިޔާވެފައެވެ.
އެނގިފައިވާ ގޮތުގައި ބާރު ސްޕީޑްގައި އެ ސައިކަލް ދުއްވި މީހާ އަތުގައި ލައިސަންސް ނެތްއިރު، އޭނާ ވަނީ މީގެ ކުރިން އެތައް ފަހަރަކު ފުލުހުން ހިފަހައްޓައި ޖޫރިމަނާވެސް ކޮށްފައެވެ.
