އާޖެންޓީނާގެ ގައުމީ ފުޓުބޯޅަ ޓީމުން ލިއޮނެލް މެސީ ރިޓަޔާކުރާނެ ދުވަހެއް ނިންމާނީ އޭނާ އަމިއްލައަށް ކަމަށް، އެ ގައުމުގެ ފުޓުބޯޅަ އެސޯސިއޭޝަން (އެފްއޭ) ގެ ރައީސް ކްލައުޑިއޯ ޓަޕިއާ ބުނެފިއެވެ.
އާޖެންޓީނާގެ ޓީވީ ޗެނަލަކަށް ދިން އިންޓަވިއުއެއްގައި ޓަޕިއާ ބުނި ގޮތުގައި، ފުޓުބޯޅަ ކުޅުން ހުއްޓައިލުމާ މެދު ގޮތެއް ނިންމާނީ ހަމައެކަނި މެސީއެވެ. “އެއީ ސީދާ އޭނާ އަމިއްލައަށް ނިންމާނެ ނިންމުމެއް،” ޓަޕިއާ ބުންޏެވެ. އަދި 2022 ވަނަ އަހަރުގެ ވޯލްޑް ކަޕަށް ފަހު، މިއަހަރުގެ މުބާރާތުގައި މެސީ ކުޅޭނެކަން ޔަގީންނުވި ނަމަވެސް، މި ފަހަރުގެ މުބާރާތުގައި އޭނާގެ ފަރާތުން ފެނުނީ ވަރަށް މޮޅު ކުޅުމެއް ކަމަށް ޓަޕިއާ ފާހަގަކުރިއެވެ. “އޭނާއަށް ހަމަޖެހިލަން ފުރުސަތު ދޭންޖެހޭ. ފުޓުބޯޅަ ކުޅެގެން އޭނާއަށް ލިބޭ އުފާވެރިކަން ކުރިއަށްގެންދަން ފުރުސަތު ދިނުމަށްފަހު، އެންމެ ރަނގަޅު ވަގުތުގައި އޭނާ ގޮތެއް ނިންމާނެ،” ޓަޕިއާ ބުންޏެވެ.
އެމެރިކާގައި މިދިޔަ މަހު ނިމުނު ވޯލްޑް ކަޕްގެ ފައިނަލްގައި އިތުރު ވަގުތު ކުޅެގެން 1-0 އިން ސްޕެއިން އަތުން އާޖެންޓީނާ ވަނީ ބަލިވެފައެވެ. ނަމަވެސް މި މުބާރާތުގައި އުމުރުން 39 އަހަރުގެ މެސީ ވަނީ އަށް ގޯލު ޖަހައި، ހަތަރު ގޯލު ޖެހުމަށް އެހީތެރިވެދީފައެވެ. މެސީއަށް 39 އަހަރު ފުރުނީ މުބާރާތުގެ ގްރޫޕް ސްޓޭޖުގައި އޮސްޓްރިއާ ކޮޅަށް ދެ ގޯލު ޖެހިތާ ދެ ދުވަސް ފަހުން، ޖޫން 24 ގައެވެ. ގައުމީ ޓީމުން ރިޓަޔާކުރާނެ ދުވަހެއްގެ އިތުރުން، އެމެރިކާގެ މޭޖާ ލީގު ސޮކާ (އެމްއެލްއެސް) ގެ އިންޓަ މިއާމީއަށް އޭނާ ކުޅުން ކުރިއަށްގެންދާނީ ކިހާ ދުވަހަކު ކަމެއްވެސް މެސީ އަދި ބުނެފައެއް ނުވެއެވެ.
މި މުބާރާތުގައި މެސީ ވަނީ ވޯލްޑް ކަޕްގެ ތާރީހުގައި އެންމެ ގިނަ ގޯލު ޖެހުމުގެ ރެކޯޑު އޮތް ޖަރުމަނުގެ މިރޮސްލާވް ކްލޯސާގެ 16 ގޯލުގެ ރެކޯޑު މުގުރައިލާފައެވެ. އެހެންނަމަވެސް، ފްރާންސްގެ ކީލިއަން އެމްބާޕޭ ވަނީ 22 ގޯލާއެކު މުބާރާތް ނިންމައިލައި، މެސީއަށް ވުރެ ކުރި ހޯދާފައެވެ. ޓަޕިއާ ބުނި ގޮތުގައި މެސީއަކީ އާޖެންޓީނާ ޓީމުގެ އެންމެ މުހިންމު ކުޅުންތެރިޔާއެވެ. އަދި މެޗަކަށް ފަހު މެޗެއްގައި އޭނާ ރެކޯޑުތައް މުގުރަމުން ދިޔަ ކަމަށް ޓަޕިއާ ބުންޏެވެ.
ސްޕެއިން، ޕޯޗުގަލް އަދި މޮރޮކޯގައި 2030 ވަނަ އަހަރު ބާއްވާ ވޯލްޑް ކަޕް އަންނައިރު މެސީގެ އުމުރުން 43 އަހަރު ފުރޭނެއެވެ. ވޯލްޑް ކަޕަށް 100 އަހަރު ފުރޭ މުނާސަބަތާ ގުޅިގެން، އާޖެންޓީނާ، އުރުގުއޭ އަދި ޕެރަގުއޭގައިވެސް އެ މުބާރާތުގެ އެއް މެޗު ކުޅުމަށް ވަނީ ހަމަޖެހިފައެވެ. ފީފާގެ ތަފާސްހިސާބުތައް ދައްކާ ގޮތުން، ގޯލްކީޕަރުން ފިޔަވައި ވޯލްޑް ކަޕް މެޗެއްގައި ކުޅުނު އެންމެ އުމުރުން ދުވަސްވީ ކުޅުންތެރިޔަކީ ކެމަރޫންގެ ރޮޖަރ މިލާއެވެ. އޭނާ ކުޅުނީ 42 އަހަރާއި 39 ދުވަހުގައެވެ. މީގެ އިތުރުން، ޕޯޗުގަލްގެ ކްރިސްޓިއާނޯ ރޮނާލްޑޯ ވަނީ އުމުރުން 41 އަހަރުގައި މިއަހަރުގެ މުބާރާތުގައި ކުޅެފައެވެ.
އާޖެންޓީނާއިން ދެން އެންމެ އަވަހަށް މެޗެއް ކުޅުމަށް ހަމަޖެހިފައިވަނީ އަންނަ ސެޕްޓެންބަރު މަހުގެ 21 އިން 29 އަށް އޮންނަ އިންޓަނޭޝަނަލް ބްރޭކުގައެވެ. މި މުއްދަތުގައި ކުޅޭނެ ކަމަށް ބެލެވޭ އެކުވެރިކަމުގެ ދެ މެޗުގައި ނުކުންނާނެ އިދިކޮޅު ޓީމެއް އަދި އިއުލާންކޮށްފައެއް ނުވެއެވެ. އަލްޖަޒީރާއިން ރިޕޯޓުކޮށްފައިވާ ގޮތުގައި، އަމިއްލަ ގައުމުގައި އާޖެންޓީނާއިން ދެން ކުޅޭ މެޗަކީ މެސީގެ ފަހު މެޗަށް ވުމަކީ އެކަށީގެންވާ ކަމެކެވެ. ކޮޕާ އެމެރިކާގެ ޗެމްޕިއަނުންގެ ގޮތުގައި އާޖެންޓީނާއިން 2028 ވަނަ އަހަރުގެ މުބާރާތާ ކުރިމަތިލާއިރު، އެ މުބާރާތް ބާއްވާނެ ގައުމެއް އަދި ކަނޑައަޅާފައެއް ނުވެއެވެ.
