ހަނގުރާމައަށް ދިޔުމަށްފަހު ތުރުކީގައި ތާށިވި ދެ ދިވެއްކެއްސަކު އަނބުރާ ރާއްޖެ ގެނެސްފައިވާ ކަމަށް ހޯމް މިނިސްޓަރު، އަލީ އިހުސާން ވިދާޅުވެއްޖެއެވެ.
ހޯމް މިނިސްޓްރީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، އެކި ގައުމުތަކުގައި ހިނގާ ދާހިލީ ހަނގުރާމަތަކަށް ދިއުމަށްފަހު އެނބުރި ރާއްޖެ އަންނަން ބޭނުންވާ ފަރާތްތަކަށް ވަކި އުސޫލެއްގެ މަތިން އެ ފުރުސަތު ދެމުންދާ ކަަމަށެވެ.
އަދި އެފަދަ ފަރާތްތަކުން ރާއްޖެ އައުމަށްފަހު 3 މަހުގެ ރިހިބިލިޓޭޝަނެއް ފުރިހަމަ ކުރުމަށްފަހު ނޫނީ އެމީހުން މުޖްތަމައުއަށް ނުނެރެވޭނެ ކަމަށް ގާނޫނުގައި ބުނެފައި ވާއިރު އެގޮތުގެ މަތިން މަސައްކަތް ކުރަމުންދާ ކަމަށް ވެސް އިހުސާން ވިދާޅުވިއެވެ.
އެގޮތުގެ މަތިން ލިބުނު މައުލޫމާތުގެ އަލީގައި ސީރިއާގެ ދެ ސަރަހައްދެގައި ތިބި 60 ދިވެހީން ގެނެއުމުގެ މަސައްކަތް މިހާރު ކުރަމުންދާ ކަމަށް މިނިސްޓަރު ފާހަގަ ކުރެއްވިއެވެ. މީގެ އިތުރުން ވެސް އެހެން ހަނގުރާމަވެރި ސަރަހައްދުތަކުގައި ތިބި ފަރާތްތަކުން ވެސް ގެނައުމުގެ މަސައްކަތް ކުރަމުންދާ ކަމަށް ވެއެވެ.
އެގޮތުން ހަނގުރާމައަށް ދިއުމަށްފަހު އެނބުރި ތުރުކީއަށް ހިޖުރަ ކުރެވި އެތަނުގައި ޑިޓެއިން ކޮށްފައިވާ ކަމުގެ މައުލޫމާތު ތުރުކީ ސަރުކާރުން ދިވެހި ސަރުކާރަށް ހިއްސާ ކުރުމުން އެ ފަރާތްތަށް ގެނައުމަށް މަސައްކަތް ކޮށްފައިވާ ކަމަށް މިނިސްޓަރު ވިދާޅުވިއެވެ. އަދި ކުރެވުނު މަސައްކަތުން 14 އަހަރުގެ އަންހެން ކުއްޖަކާ އޭނާގެ މަންމަ އަނބުރާ ރާއްޖެ ގެނެސް ދޭންޖެހޭ ރިހިބިލިޓޭޝަން ދެމުންދާ ކަަމަށްވެސް މިނިސްޓަރު ވަނީ ވިދާޅުވެފައެވެ.
އެކި ގައުމުތަކުގައި ހިނގާ ދާހިލީ ހަނގުރާމަތަކަށް ދިއުމަށްފަހު އެނބުރި ރާއްޖެ އަންނަ މީހުންނާއި ކުދިން ބަންދުކުރާ އިޖުރާއަތްތަކެއް ވަނީ ކަނޑައަޅާފައެވެ. އެފަދަ ފަރާތްތައް ބަންދު ކުރުމުގެ އިހްތިޔާރު ހޯމް މިނިސްޓަރަށް މި އުސޫލުގެ ދަށުން ލިބޭއިރު، މި އިޖުރާއަތްތައް އެކުލަވާލާފައި ވަނީ ޓެރެރިޒަމް މަނާ ކުރާ ގާނޫނުން ބާރު ލިބިގެންނެވެ.
އެގޮތުން އެ މަރުކަޒުގައި ބަންދު ކުރެވޭ ހުރިހާ އެންމެންވެސް ދޫކޮށްލާނީ އެމީހުންނަކީ މުޖުތަމައަށް ރުޖޫއަވުމަށް ތައްޔާރުވެފައިވާ ފަރާތެއްކަން ނުވަތަ ނޫންކަން ކަނޑައެޅުމަށް ހަދަންޖެހޭ ރިސްކް އެސެސްމަންޓް ހެދުމަށްފަހު އެވެ. އެ ފަރާތަކީ މުޖުތަމައަށް ރުޖޫއަވުމަށް ތައްޔާރުވެފައިވާ ފަރާތެއް ނޫން ކަމަށް ކަނޑައަޅައިފިނަމަ، ރީހެބިލިޓޭޝަން ޕްރޮގްރާމާއި ރީ-އިންޓަގްރޭޝަން ޕްރޮގްރާމް ފުރިހަމަކުރަން ޖެހޭނެ އެވެ.
މީގެ ކުރިން ވެސް އެކި ހަނގުރާމަވެރި ސަރަަހައްދުތަކުން މީހުން ގެނެސް މުޖްތަމައުއަށް ދޫކުރުމަށް ރިހިބިލިޓޭޓް ކޮށްފައިވާއިރު ބައެއް މީހުން ވަނީ އެ ޕްރޮގްރާމް ފުރިހަމަ ކުރުމަށްފހު އަނބުރާ މުޖްތަމައުއަށް ދޫކޮށްލާފައެވެ.
