އަލް އަބްރާރް ގްރޫޕުގެ ހަވާލުގައި އުމްރާއަށް ފުރަން ހަމަޖެއްސުއްމަށްފަހު ފަހު ވަގުތު ދަތުރު ކެންސަލް ކޮށްލި މައްސަލައިގައި އެ އުމްރާ ގުރޫޕަށް ދޫކޮށްފައިވާ ހުއްދަ ވަގުތީގޮތުން ހިފަހައްޓައިފިއެވެ.
އުމްރާއަށް ފުރަން ހަމަޖެއްސުއްމަށްފަހު ފަހު ވަގުތު ދަތުރު ކެންސަލް ކޮށްލި މައްސަލައިގައި އިއްޔެ ރޭ ވަނީ އެ ގްރޫޕްގެ ފަރާތުން އުމްރާއަށް ދިއުމަށް ފައިސާ ދައްކާފައި ތިބި ބައެއް ފަރާތްތަކުން އެ ގްރޫޕްގެ އޮފީސް ކައިރިއަށް އެއްވެ ކަންބޮޑުވުން ފާޅުކޮށްފައެވެ.
އެ ސަރަހައްދުގައި ތިބި މީހުން ބުނެފައިވާ ގޮތުގައި އުމްރާ އަށް ފުރުމުގެ ކުރިން އެ ދުވަހުގެ ހެނދުނު ދަބަސްތައް ގެންދިއުމަށް އެންގި ކަމަށާއި ފަހުން އެންގީ އެއާޕޯޓަށް ދަމުން ދަބަސް ގެންދިއުމަށް ކަމަށެވެ. އެ އެންގުމަށް ފަހު، ގްރޫޕުން ވަނީ ކުއްލި ބައްދަލުވުމެއް ބާއްވާފައި ކަމަށާއި އުމްރާ ދަތުރު ކެންސަލް ކުރިކަން އެ ބައްދަލުވުމުގައި އަންގައި ސަބަބެއް ކަމަށް ބުނީ، މިހާރު މެދުއިރުމަތީގައި ހިނގަމުންދާ ހަނގުރާމަ އަށް މި މަހުގެ 26 ގެ ފަހުން ވެސް ވާނެ ގޮތެއް ނޭނގޭތީ ކަމަށެވެ.
އެ 110 މީހުންގެ ފުރުން ކެންސަލް ކުރިއިރު، އެ އެންމެން ވެސް ތިބީ ރޯދަ އުމުރާއަށް ދިއުމުގެ ހުރިހާ ތައްޔާރީތަކެއް ވެފައި ވުމުން ކުއްލިއަކަށް ދަތުރު ކެންސަލް ކޮށްލުމާ ގުޅިގެން ހިތްހަމަނުޖެހުނު އާންމުން ވަނީ މި މައްސަލަ އިސްލާމިކް މިނިސްޓަރު މުހައްމަދު ޝަހީމް އަލީ ސައީދުއާ ހަަމައަށް ގެންގޮސްފައެވެ.
އެކަމާ ގުޅިގެން އިސްލާކް މިނިސްޓްރީން ނެރުނު ބަޔާނެއްގައި ބުނީ، މިހާތަނަށް މިނިސްޓްރީން ބެލި ބެލުމުން އުމްރާ ދަތުރު ކެންސަލްކޮށްފައި ވަނީ މަގުބޫލު އެއްވެސް ސަބަބެއް ނެތި އުމްރާއަށް މީހުން ގެންދިޔުމާ ބެހޭ އުސޫލާވެސް ހިލާފަށް ކަމަށެވެ. އެހެން ކަމުން އެ އުމްރާ ގުރޫޕުން މީހުން އުމްރާއަށް ގެންދިއުމާ ބެހޭ ހުއްދަ ވަގުތީގޮތުން ހިފަހައްޓާ ކަމަށްވެސް އިސްލާމިކް މިނިސްޓްރީން ބުނެއެވެ.
އަދި ހަމަ އެހެންމެ އެކަމާ ގުޅޭ މައުލޫމާތު އިތުރަށް ސާފު ކުރުމަށްފަހު އުސޫލުގެ ތެރެއިން އަޅަންޖެހޭ ފިޔަވަޅު އަޅާނެ ކަމުގެ ޔަގީންކަން މިނިސްޓްރީން ވަނީ ދީފައެވެ. އަދި އަލް އަބްރާރް އުމްރާރު ގުރޫޕުގެ ފަރާތުން އުމްރާގެ އަޅުކަމަށް ދާން ފައިސާ ދެއްކުމަށްފަހު ނުދެވި ތި ފަރާތްތަކަށް އެހީތެރިކަން ފޯތުކޮށްދިނުމުގެ މަސައްކަތް ވެސް ކުރިއަށްދާ ކަމަށް އެ މިނިސްޓްރީން ވަނީ މައުލޫމާތު ދީފައެވެ.
އުމްރާއަށް މީހުން ގެންދިއުމުގެ ފަސް ދުވަސް ކުރިން އިސްލާމިކް މިނިސްޓްރީއަށް އުމްރާ ގެންދާ މީހުންގެ ލިސްޓާއި ތިބޭ ހޮޓަލާއި ވިސާގެ މައުލޫމާތު ފޮނުވަން ޖެހެއެވެ. އަލް އަބްރާރް ގްރޫޕުން ބުނީ އެ ޑޮކިއުމަންޓުތައް އިސްލާމިކް މިނިސްޓްރީ އަށް ފޮނުވި ނަމަވެސް އޭގެ މައުލޫމާތެއް އެ މިނިސްޓްރީގައި ނެތް ކަމަށާއި އެހެންކަމުން ހާއްސަ ތަހުގީގެއް ފަށާފައިވާ ކަމަށެވެ.
އިސްލާމިކް މިނިސްޓްރީން ބުނެފައިވާ ގޮތުގައި އަލް އަބްރާރު ގްރޫޕަކީ އުމްރާ އަށް މީހުން ގެންދިއުމުގެ ހުއްދަ އޮތް ކަމަށް އޭޕްރީލް، 2025 ގައި ނެރެފައިވާ ލިސްޓުގައި ވެސް ހިމެނޭ ކުންފުންޏެެއް ކަމަށެވެ.
