ހާލިދު ޔާސީން އުފަންވީ 1946 ވަނަ އަހަރު ނިއުޔޯކުގެ ހާލެމްއަށެވެ. ޔާސީންގެ ފުރާވަރުގެ ދުވަސްތައް ހޭދަކޮށްފައިވަނީ ބްރޫކްލިންގައެވެ. ކްރިސްޓިއަން އާއިލާއަކަށް ނިސްބަތްވާ ޔާސީން އަކީ ޔަތީމަކަށް ނުވި ނަމަވެސް އާއިލާގެ މާލީ ހާލަތުގެ ސަބަބުން އޭނާ ދިރިއުޅެމުން ދިޔައީ ވަރަށް ނިކަމެތި، ހިތްދަތި ހާލެއްގައެވެ.
އުމުރުން 3 އަހަރުން ފެށިން އެކި ޔާތިމުހާނާތަކުގައި އުޅެމުން އައި ޔާސީންގެ އުމުރުން 15 އަހަރު ވަންދެން އުޅުނީ އެފަދަ ހާލެއްގައެވެ. އޭނާ ސިފަކުރާ ގޮތުގައި ކޮންމެ ޔަތީމުހާނާއަކީ ތަފާތު ކްރިސްޓިއަން ދީނެއް އޮންނަ ގެއެކެވެ. އެހެންކަމުން އޭނާއަށް އެ ދުވަސްވަރު ކްރިސްޓިއަން ދީނުގެ އެކި ކަހަލަ މައުލޫމާތުތައްވެސް ލިބިގެން ދިޔައެވެ.
އަމިއްލައަށް އިސްލާމްދީނާ ގުޅުން ހުރި އެކި މައުލޫމާތުތައް ހޯދުމުގެ މަސައްކަތުގެ ތެރެއިން ޔާސީން އަށް އިސްލާމްދީނަކީ އެންމެ ރަނގަޅު ދީން ކަމުގައި ގަބޫލުކުރެވުނެވެ. އިސްލާމްދީންގެ ކަންތައްތައް ދިރާސާ ކުރަމުން ދިޔަ ޔާސީން އިސްލާމްވީ 1965 ވަނަ އަހަރު އެވެ. އަދި އޭގެފަހުން ސައުދީ އަރަބިޔާގެ މަދީނާގައި އަރަބި ބަހާއި އިސްލާމީ ދާއިރާއިން ޔާސީން ވަނީ ތައުލީމު ހާސިލުކޮށްފައެވެ.
ޔާސީން އާއި އޭނާގެ ދެ ބޭބެއިން ކަމުގައިވާ ސޭމް އާއި ޖޫލިއަސް އުޅުނު ހިތްދަތި ހާލުގެ ސަބަބުން މުޅި ދުނިޔެވެސް އެމީހުންނާ ދެކޮޅުވެފައި ވާ ކަމަށް ހީކުރެވުނު އުނދަގޫ ދަނޑިވަޅު އިސްލާމްދީންގެ ނޫރު ފެނިގެން ދިއުންވެގެން ދިޔައީ އެމީހުންގެ މުޅި ދިރިއުޅުން ބަދަލުކޮށްލި ކަމެއް ކަމުގައެވެ.
ޔާސީންގެ ދީނީ މަސައްކަތް ފެށީ ބްރޫކްލިންގެ އިރުމަތީ ޕާކްވޭގައި ހުންނަ އާމިރު ނުވަތަ ޖަމްމަތު އިތާހުދުލް އިގްވާގެ ލީޑަރެއްގެ ގޮތުގައެވެ. ގްލޯބަލް ދަވާ ސްޕީކަރެއްގެ ގޮތުގައި މަޝްހޫރުވެފައިވާ، ޔާސީން ވަނީ 89 އަކަށްވުރެ ގިނަ ގައުމުގައި އިސްލާމްދީނުގެ އެކި މައުޟޫތަކަށް ލެކްޗާ ދެއްވާފައެވެ. އޭނާގެ ފާހަގަކޮށްލެވޭ ދަރުސްތަކުގެ ތެރޭގައި ދަ ޕާޕަސް އޮފް ލައިފް، މުހައްމަދު - ދަ މޭން އެންޑް ހިޒް މެސެޖް އަދި ދަ ހީސްޓޯރިކަލް ޖީސަސް ހިމެނެއެވެ.
ޔާސީން ވަނީ އިސްލާމްދީނަށް ދައުވަތު ދިނުމަށް އެކި ނަންނަމުގައި ގިނަ ޖަމިއްޔާތަކެއް ހިންގާފައެވެ. އޭގެ ތެރޭގައި 2010 ވަނަ އަހަރު އުވާލި އިސްލާމިކް ބްރޯޑްކާސްޓިން ކޯޕަރޭޝަން ލިމިޓެޑް ވެސް ހިމެނެއެވެ. ޔާސީން ވަނީ ގެސްޓް ސްޕީކަރެއްގެ ގޮތުގައި އަދި ބަހުސް ޕެނަލްތަކުގެ އިތުރުން ޔުނިވާސިޓީތަކުގައި ދަރިވަރުންނަށް ލެކްޗާ ދެއްވާފައެވެ. އަދި ޒުވާނުންނަށް އަމާޒުކޮށްގެން ބާއްވާ އިވެންޓްތަކުގައި ޔާސީން ދެއްވާ ދަރުސްތަކަށް ޒުވާނުންގެ ބޮޑު ތާއިދެއްވަނީ ލިބިގެން ގޮސްފައެވެ.
އިސްލާމްދީން ކިޔަވައިދިނުމަށް ހާއްސަ ޖަމިއްޔާއެއް ކަމަށްވާ އިސްލާމިކް ޓީޗިން އިންސްޓިޓިއުޓްގެ އެގްޒެކެޓިވް ޑިރެކްޓަރެއްގެ މަގާމު އަދާކުރައްވާ ޔާސީން ވަނީ އިސްލާމްދީނަށް ތަބާވާ މީހުންނާ މެދު އުފެދިފައިވާ ގޯސް ހިޔާލުތައް ނައްތާލާ، ދީނާ މެދު އުފެދިފައިވާ ޝައްކުތައް ސާފުކޮށްދިނުމަށް 35 އަހަރަށްވުރެ ގިނަ ދުވަހު މަސައްކަތް ކުރައްވާފައެވެ.
ޔާސީންގެ އެމެޒޯން އޮތޯ ޕްރޮފައިލް އިން ދައްކާ ގޮތުން އޭނާގެ ދަރުސްތަކުގެ ސަބަބުން 75،000 އަށް ވުރެ ގިނަ މީހުން އިސްލާމްދީން ގަބޫލުކޮށްފައިވެއެވެ.
