ބީއެމްއެލް އެފޯޑަބަލް ހޯމް ލީސިން ކުންފުނިން ހިންގާ އެފޯޑަބަލް ހައުސިންގެ ސްކީމްގެ ދަށުން އިމާރާތްކުރާ ޔުނިޓްތަކުގެ އަމަލީ މަސައްކަތް ފަށައިފިއެވެ.
ހުޅުމާލޭގައި އިއްޔެ މިކަމަށް ހާއްސަ ރަސްމިއްޔާތެއް ބާއްވާފައިވާ އިރު، މި މަސައްކަތްތައް ފައްޓަވައި ދެއްވީ ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބާއި ބީއެމްއެލްގެ ޗެއާޕާސަން އަހްމަދު އަލީ ހަބީބާއި ބީއެމްއެލްގެ ސީއީއޯ އަދި މެނޭޖިން ޑިރެކްޓަރު މުހައްމަދު ޝަރީފެވެ.
އެ ރަސްމިއްޔާތުގައި ވާހަކަ ދައްކަވަމުން މުއްތަލިބު ވިދާޅުވީ، ސަރުކާރުގެ ބޯހިޔާވަހިކަމުގެ ސިޔާސަތު ކާމިޔާބު ކުރުމަށް ބީއެމްއެލުން ކުރަމުން އަންނަ މަސައްކަތަކީ ނަމޫނާ މަސައްކަތެއް ކަމަށާއި އެ ބޭންކުން މާލެ ސަރަހައްދުގައި 3،260 ހައުސިން ޔުނިޓުގެ މަސައްކަތް ކުރާއިރު، މިއީ ސަރުކާރެއްގެ 5 އަހަރުގެ ދައުރުގެ ތެރޭގައި މަޝްރޫއެއް ފަށައި، އެ މަޝްރޫއުގެ ހުރިހާ މަސައްކަތެއް ނިންމައި، އޭގެ ވެރިފަރާތްތަކާ ހަވާލުކުރެވޭނެ ފުރަތަމަ ހައުންސިން މަޝްރޫއު ކަމަށެވެ. މިއީ ރައީސްގެ ދުރުވިސްނުމުގެ ސިޔާސަތުގެ ދަށުން ރައްޔިތުންނަށް ބޯހިޔާވަހިކަން ފޯރުކޮށް ދިނުމަށް ފެށި މަސައްކަތެއް ކަމަށާއި ބީއެމްއެލްގެ މި މަސައްކަތްތަކަކީ ރާއްޖޭގެ ރައްޔިތުންނަށް އެންމެ ފައިދާހުރި ކަންކަން ކުރުމުގައި އިސްނެގުމުގެ ނަމޫނާއެއް ކަމަށް މުއްތަލިބް ވިދާޅުވިއެވެ.
ބީއެމްއެލްގެ ސީއީއޯ މުހައްމަދު ޝަރީފް އެ ރަސްމިއްޔާތުގައި ދެއްކެވި ވާހަކައިގައި ވަނީ އެ މަޝްރޫއު ހިންގާ ގޮތުގެ ތަފްސީލުތަކެއް ދެއްވާފައެވެ. އެ ގޮތުން މި މަޝްރޫއުތައް ހިންގާނީ އެމްއެމްއޭގެ އިންކްލޫސިވް ނެޝަނަލް އެފޯޑަބަލް ހައުސިން ސްކީމްގެ ދަށުން ގާއިމުކޮށްފައިވާ ގަވަނަންސް އަދި ރިސްކް ސްޓޭންޑަޑްތަކާ އެއްގޮތަށް ކަމަށް އޭނާ ވިދާޅުވިއެވެ. އިވެލުއޭޝަން މަރުހަލާ ފުރިހަމަ ކުރުމަށްފަހު މަސައްކަތް ކުރުމަށް ހޮވާފައި ވަނީ ރާއްޖެ އާއި ރާއްޖޭން ބޭރުގެ ކުންފުނިތަކާ ހަވާލުކޮށްގެން ކަމަށް ވެސް ޝަރީފް ވިދާޅުވިއެވެ. 2028 ވަނަ އަހަރުގެ ޖުލައި މަހުގެ ނިޔަލަށް މަޝްރޫއުތައް ނިމޭނެ ކަމަށް
މި މަސައްކަތް ހަވާލުކޮށްފައިވާ ރާއްޖޭގެ ކުންފުނިތަކަކީ އަމީން ކޮންސްޓްރަކްޝަން ޕްރައިވެޓް ލިމިޓެޑާއި އެފްޑަބްލިއު ކޮންސްޓްރަކްޝަން ޕްރައިވެޓް ލިމިޓެޑް އަދި ރަޝީދު ކާޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑް އެވެ. މި މަސައްކަތް ކުރަމުންދާ ރާއްޖޭން ބޭރުގެ ކުންފުނިތަކަކީ ބެއިޖިން އާބަން ކޮންސްޓްރަކްޝަން ގްރޫޕް އަދި ޗައިނާ މެޝިނަރީ އިންޖީނިއަރިން ކޯޕަރޭޝަނެވެ.
ބީއެމްއެލް އެފޯޑަބަލް ހޯމް ލީސިން ކޮމްޕެނީ ޕްރައިވެޓް ލިމިޓެޑް އަކީ މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލާފައިވާ އިންކްލޫސިވް ނޭޝަނަލް އެފޯޑަބަލް ހައުސިން (އައިއެންއޭއެޗް) ދަށުން ކަނޑައަޅާފައިވާ މަގުސަދު ހާސިލްކުރުމަށް ބޭންކް އޮފް މޯލްޑިވްސް އިން އުފެއްދި ސަބްސިޑަރީ ކުންފުންޏެކެވެ. އެ ކުންފުނިން ވަނީ އެފޯޑަބަލް ހައުސިންގެ ސްކީމްގެ ދަށުން 2 މަޝްރޫއެއްގެ މަސައްކަތް ބޭރުގެ 2 ކުންފުންޏަކަށް މީގެ ކުރިން ހަވާލުކޮށްފައެވެ.
