2020 ވަނަ އަހަރު މުޅި ދުނިޔެއަށް ކުރިމަތިވި ކޮވިޑްގެ ބަލިމަޑުކަމަށް ފަހު ރާއްޖޭގެ ސްކޫލްތަކުގެ ކިޔެވުން ފަސްވެފައި އޮތް އޮތުމަށް ބަދަލު ގެނެސް ދިރާސީ އާ އަހަރުގެ ކިޔެވުން މިއަދު ފަށައިފިއެވެ.
ކޮވިޑްގެ ބަލިމަޑުކަމުގެ ސަބަބުން ސްކޫލް ކިޔެވުން ފަސްކޮށްފައި ވަނީ 2022 ވަނަ އަހަރުއެވެ. ވޭތުވެ ދިޔަ ހަތަރު އަހަރަށް ފަހު ޖެނުއަރީ މަހުގައި ސްކޫލް ކުދިންގެ ކިޔެވުން ފެށި މިއީ ފުރަތަމަ އަހަރެވެ.
އެޑިއުކޭޝަން މިނިސްޓްރީން ބުނާ ގޮތުގައި މިއަދު ސްކޫލްތަކުގެ ކިޔެވުން ފަށާފައި ވާއިރު، ސަރުކާރުގެ 218 ސްކޫލްގައި 77،000 އަށް ވުރެ ގިނަ ދަރިވަރުން ތައުލީމް ހާސިލްކުރަމުން ދާނެއެވެ. އަދި ދަރިވަރުންނަށް އުނގަންނައި ދިނުމަށް ޖުމްލަ 10500 މުދައްރިސުން ހަރަކާތްތެރިވާ އިރު 8000 ދިވެހި މުދައްރިސުންނާއި 2500 ބިދޭސީ މުދައްރިސުން ތިބޭނެ ކަމަށް އެ މިނިސްޓްރީން ބުނެއެވެ.
ޖުމްލަ 77000 އަށް ވުރެ ގިނަ ދަރިވަރުން ސަރުކާރު ސްކޫލްތަކުގައި މި އަހަރު ތައުލީމް ހާސިލް ކުރަން ފަށާއިރު ސަރުކާރު ސްކޫލްތަކުގެ ގްރޭޑް 1 ގައި ޖުމްލަ 4790 ދަރިވަރުން ކިޔަވާނެ ކަމަށް އެޑިއުކޭޝަން މިނިސްޓްރީން ބުނެފައި ވެއެވެ. މީގެ ތެރެއިން މާލެ ސަރަހއްދުގައި 1748 ދަރިވަރުން އަދި އަތޮޅު ތެރޭގައި 3042 ދަރިވަރުން ތައުލީމް ހާސިލް ކުރާނެއެވެ.
އެގޮތުން އަތޮޅު ތެރެއިން މާލޭ ސަރަހއްދުގެ ސްކޫލްތަކަށް ޖުމްލަ 1530 ދަރިވަރުން މި އަހަރު ގްރޭޑް 1 އަށް ވަނުމަށް ބަދަލުވެފައި ވެއެވެ. އޭގެތެރޭގައި ހިމެނެނީ އަތޮޅުތަކުން ހުޅުމާލޭގެ ސްކޫލްތަކަށް ބަދަލުވާ 753 ދަރިވަރުންނާއި އަތޮޅުތަކުން މާލޭގެ ސްކޫލްތަކަށް ބަދަލުވާ 694 ދަރިވަރުންނާއި އަތޮޅުތަކުން ވިލިމާލެއަށް ބަދަލުވާ 83 ދަރިވަރުންނެވެ.
ކޮވިޑްގެ ބަލިމަޑުކަމަށް ފަހު ސްކޫލްތަކުގެ ކިޔެވުމަށް ބޮޑު ބަދަލެއް އައިސް ކިޔަވައިދޭ ދުވަސްވަރަށް ވެސް ވަނީ ބަދަލުތަކެއް އައިސްފައެވެ. ނަމަވެސް ވޭތުވެ ދިޔަ ހަތަރު އަހަރަށް ފަހު، މިއަހަރު ޖެނުއަރީގައި ސްކޫލްތަކުގެ ކިޔެވުން ބަދަލު ކުރުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވެވަޑައިގެން ވައުދުފުޅު މިވަނީ ފުއްދަވާފައެވެ.
އެޑިއުކޭޝަން މިނިސްޓްރީން އާންމުކޮށްފައިވާ ދިރާސީ އަހަރު 2026ގެ ކަލަންޑަރަށް ބަލާއިރު، މިއަދު ކިޔެވުން ފެށުމަށް ފަހު ކުރިއަށް އޮތް ރޯދަ މަހުގެ ފުރަތަމަ ހަފްތާއަށް ފަހު ސްކޫލްތަކުގެ ކިޔެވުން ބަންދު ވާނެއެވެ.
އެގޮތުން މާޗް މަހުގެ 1 ވަނަ ދުވަހުން ފެށިގެން އެ މަހުގެ 8 ވަނަ ދުވަހާ ހަމައަށް ޕްރޮފެޝަނަލް ޑިވެލޮޕްމަންޓް ދުވަސް ގޮތުގައި ދުވަސްތައް ކަނޑައަޅައި އެ ދުވަސްވަތަކަކީ ދަރިވަރުންނަސް ބަންދު ދުވަސްތަކެއްގެ ގޮތުގައި ވަނީ ހަމަޖައްސާފައެވެ. އެއަށްފަހު ރޯދަ މަހުގެ ފަހު 10 އާއި އީދު ބަންދާ އެކު މާޗް މަހުގެ 9 ވަނަ ދުވަހުން އެ މަހުގެ 22 އާ ދެމެދަކީ ވެސް ސަރުކާރު ބަންދު ދުވަސްތަކެއްގެ ގޮތުގައި ވަނީ ކަނޑައަޅާފައެވެ. އެގޮތުން އީދަށް ފަހު ދެން ސްކޫލްތަކުގެ ކިޔެވުން ފެށޭނީ މާޗް 23 ވާ އާދިއްތަ ދުވަހުއެވެ.
މިއަހަރުގެ ފުރަތަމަ ޓާމްގެ މިޑް ބްރޭކެއްގެ ގޮތުގައި މެއި 24 އިން 30 އަށް ހަފްތާއެއްގެ ބަންދެއް ލިބޭނެއެވެ. މި ބަންދު ދިމާވާނީ ބޮޑުއީދަށެވެ. އެއަށް ފަހު މެއި 31 ކިޔެވުން ފެށީ ދެން ފުރަތަމަ ޓާމްގެ ކިޔެވުން ނިންމާލާ ރިޕޯތް ފޯމް ދޭނީ ޖުލައި މަހުގެ 16 ވަނަ ދުވަހުއެވެ. އެއަށްފަހު 15 ދުވަހުގެ ބަންދަކަށް ފަހު ދެވަނަ ޓާމްގެ ކިޔެވުން ފެށުމަށް ހަމަޖެހިފައި ވަނީ އޮގަސްޓް މަހުގެ 2 ވަނަ ދުވަހުއެވެ.
ދެވަނަ ޓާމްގެ މިޑް ބްރޭކަށް ދޭ ހަފްތާ ބަންދު ސެޕްޓެމްބަރު މަހުގެ 13 އިން 19 އަށް ހަމަޖައްސާފައިވާ އިރު ދިރާސީ އަހަރުގެ ކިޔެވުން ނިންމައި ރިޕޯޓް ފޯމް ދޭނީ ޑިސެމްބަރު 17 ގައެވެ. އަދި 2027 ވަނަ އަހަރުގެ ކިޔެވުން ފެށޭނީ ޖެނުއަރީ މަހުގެ 17 ވަނަ ދުވަހުގައެވެ.
